24 Jun 2021

Tautona Dr Mokgweetsi Masisi a re  lekgotla la SADC le  dumalane go romela mephato ya itshireletso kwa Mozambique go thusa go ritibatsa  seemo kwa  kgaolong ya  Cabo Delgado.

O boleletse  babega dikgang mo Gaborone ka Laboraro gore seemo kwa  Mozambique ga se jese diwelang ntateng ya segongwana sa ditlhakana tlhogo tse di bolotsang ditlhaselo mo setshabeng.

Dr Masisi, yo gape eleng modulasetilo wa lekalana la SADC le le lebaganeng le tsa sepolotiki le thokgamo, a re SADC e bone go tshwanela go tsibogela  kopo  ya Mozambique ya gore lekgotla le thuse ka tsa itshireletso go hema  seemo se. 

O tlhalositse fa tshwetso e dumalanwe ka bongwefela  jwa  pelo morago ga dipuisano tse di tseneletseng  magareng ga boeteledipele jwa Mozambique  le  lekgotla la  SADC.

 E re le ntswa lekgotla la SADC le dumela fa  ntwa  kgolo e  le ya  molomo, Tautona Masisi a re  go lebega fa seemo sa Mozambique se ka seke  sa rarabologa ka puo ya molomo ka jaana se lebagane  le  bo leso le  dirwang.

A re ditsuolodi tsa  kwa Mozambique ga  di itsege ka jalo go thata  gore SADC  e ka leka go rarabolola mathata a Mozambique ka puo ya molomo.

A re Mozambique  o gololesigile go kopa  thuso kwa  mafetsheng a mangwe  kwa  ntle ga SADC, mme fela thuso eo ga e a tshwanela go   kgopakgopetsane  le  ditiro le melawana  ya  lekgotla  la SADC ya go thusa  ka  tsa  itshireletso.

Tautona Masisi a re bokwaledi bogolo ja SADC  bo filwe boikarabelo jwa go kgaoganya  seelo sa  madi se maloko a lekgotla  a tshwanelang  go a ntsha. 

A re tshwetso ya go isa  mephato ya itshireletso kwa Mozambique  ke tirafatso ya  maikaelelo le maitlamo a SADC a go netefatsa  fa  gona le kagiso le thitibalo mo kgaolong  ya  Borwa jwa Afrika.

O tsweletse  ka go tlhalosa  fa Botswana  a tlaa romela  baitseanape  ba tsa  itshereletso le  dithuso tsotlhe  tse  di tlhokafalang go ritibatsa seemo kwa  Mozambique.

A re Botswana  o ikgantsha ka  mephato ya itshireletso ya maemo a ntlha, jalo o tshepha  fa e tlaa  dira tiro e ntle  kwa  Mozambique. 

Tautona  Masisi o ne  gape  a kopa setshaba  go  tswelela ka go ikgapha  mo segajajeng  sa COVID-19, ka  go supafala  fa  se tsaya  phekelo e sele. BOKHUTLO