21 Jun 2021

Baithuti kwa Serowe College of Education ba lela ka dikgwetlho tse ba reng di tlhoka go potlakelwa. 

Moeteledipele wa lekgotla la baithuti, Mme Tshireletso Mack, o ntshitse matshwenyego a bone fa Mothusa Tona wa Thuto e Kgolwane, Dipatlitisiso, Boitseanape le Boranyane, Rre Ronald Shamukuni a ne a ba etetse bosheng. Mme Mack o boletse fa baithuti ka kakaretso ba na le dikgwetlho tse di tlhokang gore lephata le di tsibogele ka bofefo.

 A re ga kgotsofalele ka fa ba thusiwang ka teng le mororo ba itela nako le nako. 

A re dikatso le dithuso dingwe ga di tle sentle, a tlatsa ka gore ditlamelo dingwe tse ba di dirisang mo dithutong di a ba ngongoregisa.

Mme Mack a re mo go tsa botsogo, ba beilwe ka fa mosing.

A re le ntswa bangwe ba bone ba amiwa ke mogare wa corona, go tsaya lebaka gore ba botsogo ba tsiboge go thusa kwa sekoleng.

O boletse fa tiriso ya maranyane kwa sekoleng sa bone e le nngwe ya dikgwetlho ka maranyane a sa bereke sentle le mororo puso e rotloetsa tiriso ya maranayane go fefosa ditirelo.

A re se se ama baithuti  le bodiredi jwa sekole.

Mme Mack o boletse fa dipone tsa mekgwatlha mo sekoleng di sa dire sentle mo go bakang gore dirukutlhi di thube kgapetsa kgapetsa mo sekoleng. 

O boletse gape fa mabala a metshameko otlhe a se mo seemong se se itumedisang le ntswa ba tshwanetse go itshidila mebele nako le nako.

Mogokgo wa sekole, Rre Johane  Oletile ene a re sekole seo ke sengwe sa tse di dirang botoka thata mo go aloseng barutabana ba tlhwatlhwa.

A re bodiredi le baithuti ba makgolo a supa, mme tirisano mmogo ke ee kwa godimo thata.

O ne a ngongorega ka mabala a metshameko a kaya fa a se mo seemong se se itumedisang.

Rre Oletile o boletse fa go na le tlhaelo ya matlo a boroko a babereki mme seo se ba kgoba marapo ka ba sa nne sentle le fa ba tlhaela.

Mogokgo a re megala ya sekole e senyega kgapetsa kgapetsa mo go kgoreletsang tomagano mo go tsa maranyane, a bo a re ntlo ya boapeelo ya baithuti le yone ga e a siama. Le fa go ntse jalo mothusi tona le lekoko la gagwe ba ne ba tsaya matshwenyego a, mme ba bolela fa ba tlaa a nnela fa fatshe go batla  tharabololo. BOKHUTLO