20 Jun 2021

Tona wa Tlhabololo Banana, Metshameko le Ngwao, Rre Tumiso Rakgare, a re o tshwenngwa ke bonya jwa go tlhabololwa ga lefelo la Moiyabana Youth Cooperatives. 

Lefelo leo le abetswe banana ba Moiyabana le metse e e mabapi go rua le go lema mo go lone.

Rre Rakgare o buile se mo potsolosong ka Labotlhano morago ga go etela lefelo leo le go buisanya le bagolwane le banana ka lone.

A re go utlwisa botlhoko go bona banana ba le mo letlhokong le letona la ditiro e bile lefatshe leno le na le kgwetlho le sa kgone go ijesa le ntswa go na le mafelo a a tshwanang le Moiyabana Youth Cooperatives.

 A re puso e ntshitse P2.5 million go tlhabolola lefelo leo, ka jalo ba ba maleba ba tshwanetse go dira tiro ya bone gore lefelo leo le kgone go diragatsa maikaelelo. 

Rre Rakgare a re go utlwisa botlhoko gore lefelo leo le tsere sebaka se seleele go tlhabololwa.

A re dilo di le mmalwa di tlaa dirwa mo lefelong leo jaaka thuo ya dikoko, dikolobe, temo ya maungo le merogo, thuo ya ditlhapi le tse dingwe.

Tona a re mo nakong eno lefelo leo le le selekanyo sa 45ha le setse le ageletswe mme go tlaa agiwa lefelo la modisa dikago a tla a nnang teng e. 

A re go tlaa epiwa didiba le tse dingwe gape a re tiro eo e ntsi e bile e kabo e sa bolo go simololwa.

Rre Rakgare a re ba ba maleba ba tshwanetse go dira ka bofefo jo bo kgonagalang gore tiro ya paakanyo ya lefelo e wele go thusa banana gore ba ntshe dijo le go rua. 

O ne a supa fa madi a a ntsheditsweng lefelo leo a le mantsi mo a ka kgong go fetsa ditiro tsotlhe tse di tlhokang go dirwa.

A re tlhwatlhwa ya go aga lefelo la modisa dikago e ne e le kwa godimo thata mme a kopa gore go emisiwe mme go dirwe sesha gore ditlhwatlhwa e nne tse di siameng.

A re banana ba lefatshe leno ba tlhoka ditiro mme bonnyennyane jo puso e bo tshwereng bo tshwanetse bo somarelwe gore bo kgone go ba thusa.  

Mo go tse dingwe, Rre Rakgare o ne a ikuela mo bananeng gore ba itse fa COVID-19 e se phelelo ya botshelo, ka e tlaa feta mmematshelo a boele kwa a neng a le teng.

A re monana le fa a tsene dithuto tse di kwa godimo le fa a sa di tsena go na le se a ka se dirang go tokafatsa botshelo jwa gagwe.

Tona a re fa motho a itlhoboga ga gona sepe se a ka se kgonang mme o tshwanetse a iteke a kgone go nna motho yo o nang le bokamoso.

Mopalamente wa Serowe Borwa, Rre Leepetswe Lesedi o ne a rotloetsa banana go tsaya lefelo la Moiyabana Youth Cooperatives ka tlhwaafalo. A re fa banana ba ka  nna tlhaga, lefelo leo le ka nna le seabe se setona fela thata mo go tlhabololeng matshelo a bone le gone go thusa gore lefatshe leno le ijese.

A re Moiyabana o sego thata gore a bo a na le lefelo leo mme fa banana ba sa tlhwaafale, se se ikaeletsweng go dirwa se tlaa seke se kgonagale. O ne a lebogela leeto la ga Tona Rakgare a supa fa le tla a ba tiisa moko. BOPA