09 Jun 2021

Rre Bosele Phalalo wa Mogapinyana ke mongwe wa ba ba nnileng sego go abelwa phelehu ya Dorper ka lenaneo la dihutshane la ga Tautona Mokgweetsi Masisi, mpho e e mo thusitseng go oketsa le go fetola boleng jwa leruo la gagwe.

Morui yo wa kgaolo ya Mmadinare, o ne a segofadiwa ka phelehu ngogola, tiragalo e e neng ya tsisa boitumelo mo go ene le ba lelwapa la gagwe mme ba ikudupanya gore e se re kamoso maiteko a ga Tautona a fetego lefela.

Rre Phalalo a re mpho e, e tsile a sa akanya gore ekare ngwaga mongwe a abelwe phelefu bogolo jang ke Tautona, se sa mo tiisa moko go tlotlomatsa Tautona ka go tlhokomela mpho eo gore e kgone e ntshe maduo a ba a solofetseng.

Kgwebo nngwe le nngwe go akaradiwa le leruo, e na le di-tsa yone, mme Rre Phalalo ka a ne a na le maikaelelo, a dirisa botsipa jo a sa leng a bo amule mo batsading ba gagwe le thuto e a e bapetseng mo badiring ba puso go tlamela se-sa gagwe.

Matsapa a gagwe a seka a nna a lefela, leruo la gagwe la ata ka dikonyana di feta botlhano ngwaga ono.

Big-boy, leina le ba le abetseng phelehu fa ba e reta, ga e ise e tsenye dingalo go gorogeng ga yone.

E ne e bolola e bo e tlhatlhelwa le tse dingwe ntle le matsapa ape.

“Re rata mpho e fela thata. 

Ke nnile lobaka ke sokola ke sena phelehu,” Rre Phalalo a tlhalosa.

Le fa Rre Phalalo a santse a ruela go tshetsa ba lelapa la gagwe, o ikaelela go gweba ka dinku.

Rre Phalalo o simolotse thuo ka dinku tse pedi mme jaanong di atile go nna masome a mabedi le motso, morago ga go rekisetsa ba lenaneo.

A re sephiri sa thuo ya dihutshane ke tlhokomelo, a tlhalosa fa a nna kwa masimo gore a di tlhokomele segautshwane.

“Ke solofetse palo ya dikonyana go oketsaga ka tse dingwe di santse di dusa,” Rre Phalalo a supa.

Lenaneo la dihutshane le simolotswe ke Tautona Dr Mokgweetsi Masisi go tlhabolola le go atolosa mhama wa dihutshane le go kgontsha Batswana go rekisa ka tlhwatlhwa e e kwa godimo mo mebarakeng.

Maikaelelo a lone gape ke go jwala peo ya khumo mo baruing le go atolosa diphatlha tsa mebereko.

Kwa Tamasane, Rre Modiri Mokgalagadi wa masimo a Mosamo le ene o ne latswiwa ke tlhware, a abelwa phoko ke Tautona ngogola.

Dikgwedi tse pedi a sena go amogela mpho, ya a swa ntateng ya bolwetse le go mo tsalela e ise e mo tsalele.

Diragalo e, e ne ya busetsa Rre Mokgalagadi kwa morago ka a ne a tshwanelwa ke go dirisa phoko ya Setswana go fitlhelela reka e e tlhabolotsweng.

Rre Mokgalagadi o tsene mo thuong ka 1982 mme o na le dipodi di le masome matlhano le boferabongwe e bile ke mongwe wa barui ba ba rekiseditseng puso dipodi ka lenaneo la LIMID. Bokhutlo