09 Jun 2021

 Banana bangwe ba Serowe ba ba boneng gore go nna ka mabogo go sena ditiro le mororo ba amule dithuto kwa dikoleng tse dikgolwane ba inaakantse le mananeo a puso go itshetsa.

Fa ba kopane le mothusa tona wa lephata la Tlhabololo Banana, Metshameko le Ngwao, Rre Buti Billy bosheng yo o neng a ba etetse go lekola dikgwebo tsa bone mo Serowe, mongwe wa banana bao, Rre Lopang Moanaphuti o ne a supa fa a kgonne go bula madirelo a gagwe a diaparo  tsa segompieno ka madi a lenaneo la banana la Youth Development Fund (YDF).

Rre  Moanaphuti a re  o ne a tsaya tshwetso ya go bula kgwebo ya gagwe e e bidiwang Gear 6 kwa Serowe morago ga go fetsa sekole kwa Limkokwing University of Technology and Creative Arts, maikaelelo e le go dirisa dikitso tse a di amuleng kwa sekoleng.

 O tlhalositse gore morago ga go isa kopo ya gagwe ka 2011, o ne a fiwa P100 000, madi a a neng a mo thusa go tsweledisa ditoro tsa gagwe. 

Rre Moanaphuti yo o dingwaga tse di masome mararo le botlhano, a re o simolotse ka go dira mesese le disutu tsa manyalo, a tswelela a oketsa ka go dira paka ya sekole le diaparo ka go farologana.

 A re o simolotse ka babereki ba le bararo mme a ba oketsa fa kgwebo e ntse e gola. 

E re ka lefatshe bophara le wetswe ke seru sa bolwetse jwa COVID-19, a re madirelo a gagwe le one a ne a amega fela thata mme se, sa dira gore a  fokotse palo ya babereki. 

A re o ne gape a sa kgone go dira madi a a lekanetseng go duela sekoloto sa gagwe sa YDF.

 Pele ga bolwetse jwa COVID-19, Rre  Moanaphuti a re ba ne ba kgona go rekisetsa ditlhopha tsa metshameko ka go farologana dipaka tsa tsone jaaka setlhopha sa kgwele ya dinao sa Green Lovers le sa bolo-tlowa sa Block Busters.

  A re le fa a dira diaparo tsa mariga, o santse a tshwere ka thata ka gore ditsompelo tsa go dira diaparo tsa mariga  di dingalo go bonwa ka di rekwa kwa ntle ga Botswana.

Rre Billy o ne a mo gakolola gore a batle dithuso tse dingwe tsa madi go tlhabolola kgwebo le go direla banana ba bagwe ditiro.

A re khamphani e e tshwanetse go fiwa kgwebo gore e kgone go atlega e bo e gaisane le dikhamphani tse ditona jaaka bo PUMA.

 Rre Billy o ne a etela gape kwa PUSMO Business Consultancy ya ga Rre Kabelo Pusoetsile. 

E simolotse ka 2016, mme ya adingwa madi ka 2019 gore e tlhabololwe e gole. Bokhutlo