08 Jun 2021

Baithuti ba pele ba sekole se segolwane sa Tsodilo kwa Maun, ba abetse Rre Goitsemodimo Somolekae yo ba neng ba tsena sekole nae, setofo, gase e e apayang, dipitsa, dijo, mogala wa letheka, P2 400 le tse dingwe.

Fa a bua kwa tirong e e neng e tshwerwe go rola dimpho, mokhanselara wa Boseja Bokone, Rre Limit Banyatsang o akgoletse baithuti go thusa mongwe ka bone, yo o tshelang ka bogole mme a dirisa kolotsana.

Rre Banyatsang o ba gwethile go tswelela ka mowa wa bopelotlhomogi.

A re mo bogompienong, batho ka bontsi ba itebile ba le nosi, ga ba kgathalele ba bangwe.

Mokwaledi mogolo wa setlhopha sa baithuti bao ba ngwaga wa 1994, Rre Mothusi Ditlou o tlhalositse fa maikaelelo a setlhopha e le go thusa sekole sa Tsodilo ka tse di ka tokafatsang maduo.

Rre Ditlou a re e rile ba ntse ba ikokoanya ba lemoga fa Rre Somolekae a na le dikgwetho mme ba bona go le maleba gore ba simolole ka go mo thusa.

O tlhalositse fa ba ne ba tshwaragana le kereke ya Gospel Revival le ba mokgatlho wa Losika Trust go abela Rre Somolokae kolotsana ba bo ba mo thusa gore a nne le setlankana sa setsha se a nnang mo go sone.

Mogolowe Rre Somolekae e bong Rre Gabaeme Somolekae o tlhalositse fa monnawe yo o dingwaga di masome mane, a ne a tsenwa ke bolwetse jwa go swa mhama morago ga go fetsa mophato wa botlhano mme seo sa dira gore a nne le bogole. 

A re bolwetse joo, bo aname mo losikeng lwa bone.

Rre Somolekae o lebogetse setlhopha sa baithuti go supa lorato mo go monnawe. Bokhutlo