06 Jun 2021

Mogolwane wa mapodisi a Maun, Superintendent Chenamo Orateng o ikuetse mo setshabeng go ba thusa go batla magodu a dikgomo. 

Mo potsolosong le BOPA, Rre Orateng o tlhalositse fa ba fitlhetse matlalo a dikgomo kwa morakeng wa Komkoga gaufi le Nxaraga. 

A re ba sepodisi ba itshwaragantse le ba lekgotla la barui ba Nxaraga ba ne baya kwa morakeng oo bosheng go ya go bona seemo. 

Rre Orateng o tlhalositse fa ba fitlhetse matlalo a dikgomo a a tshubilweng le matlalo a go dibolotsweng tshipi ya dikgomo mo go one. 

O ne a supa fa ka maswabi ba ise ba tshware dilalome tseo, ka jalo a kopa setshaba go ba thusa go ba tshwara. 

O ne gape a kopa setshaba le ba ba nang le marekisetso a nama go emeisa go reka nama ya bogodu a re ba sale morago tsamaiso ya go reka nama kwa matlhabelong kgotsa kwa marekisetsong a nama. 

Rre Orateng a re go reka nama kwa marekisetsong go maleba ka batho ba reka nama e e tlhabilweng ka fa molaong e bile go sireletsegile mo botsogong. 

A re seemo sa bogodu jwa leruo se a tshwenya mo kgaolong ya gagwe ya sepodisi, a tlhalosa gore fa e sale ngwaga ono o simologa go fitlha mo kgweding ya gompieno ba nnile le dikgang di le masome mabedi le bongwe. 

O supile fa bogodu jwa leruo e le poelo-morago mo baruing. 

Rre Orateng o supile fa ba tshweletse ka go dira ditshekatsheko mo marekisetsong a nama gangwe le gape go netefatsa gore nama e e rekisiwang ke e e rekilweng e bo e tlhajwa ka fa molaong. Bokhutlo