02 Jun 2021

Mogolwane wa mapodisi a Maun, Superintendent Chenamo Orateng, o ikuetse mo setshabeng go thusa go batla bangwe ba go belaelwang e le magodu a dikgomo.

Mo potsolotsong bosheng, Supt Orateng o tlhalositse fa ba bonye matlalo a dikgomo kwa morakeng wa Komkoga gaufi le Nxaraga.

A re mapodisi le lekgotla la barui kwa Nxaraga ba ne baya kwa morakeng oo bosheng go ya go bona seemo seo.

Supt Orateng o tlhalositse fa ba fitlhetse matlalo a dikgomo a a tshubilweng le matlalo a go dibolotsweng tshipi ya dikgomo mo go one.

O ne a supa fa ka maswabi ba ise ba tshware ope, ka jalo a kopa setshaba go ba thusa go ba tshwara.

O ne gape a kopa setshaba le ba ba nang le marekisetso a nama go emisa go reka nama ya bogodu a re ba sale tsamaiso ya go reka nama kwa matlhabelong kgotsa kwa marekisetsong a nama.

Supt Orateng a re go reka nama kwa marekisetsong go maleba ka batho ba reka nama e e tlhabilweng ka fa molaong.

A re seemo sa bogodu jwa leruo se a tshwenya, a tlhalosa fa e sale ngwaga ono o simologa go fitlha mo kgweding ya gompieno  ba nnile le dikgang di le masome a mabedi le bongwe.

O supile fa bogodu jwa leruo e le poelo morago mo baruing ka ba senyegelwa ke madi a go tlhokomela leruo.

O supile fa ba  dira ditshekatsheko mo marekisetsong a nama gangwe le gape go netefatsa gore nama ee rekisiwang ke e e rekilweng e bo e tlhabiwa ka fa molaong. BOKHUTLO