29 Apr 2021

Tona wa Tlhabololo Temo-thuo le Tlhomamiso Dijo, Rre Karabo Gare o abetse banni ba kgaolo ya Borolong diphoko ka Mosupologo. 

Tona Gare o tlhalositse fa puso e tsweletse ka go thusa batho gore ba kgone go itshetsa, mme kabo ya diphoko tseo e le go thusa ba ba abetsweng go tokafatsa boleng jwa leruo la bone. 

O ba kgothaditse go atisa leruo la bone, gore le ba solegele molemo, a tlatsa ka go re e tlaa re mo nakong e e sa fediseng pelo, ba bone maduo a diphoko tseo mo masakeng a bone. 

Rre Gare o akgotse Tautona Dr Mokgweetsi Masisi go bo a tsile ka lenaneo la go aba diphoko le diphelefu, a re se se tlaa isa serodumo sa barui ba mo gae golo gongwe. 

Mongwe wa ba ba abetsweng, Rre William Maoto wa Sekhutlhane o lebogetse mpho, mme a tlhalosa fa a tlaa e tlhokomela, a tlhalosa fa a filwe dipodi ka lenaneo la LIMID, mme tsa ata, a bo a kgona go ikagela le go tlhokomela bana. 

Mopalamente wa kgaolo, Rre Eric Molale le ene o ne a aba diphelefu di le nne, le dikobo, mo mafelong a a farologanyeng a kgaolo eo, a tlhalosa fa a ne a rotloetsega fa a bona Tautona a dira tiro e ntle e. 

O kopile botlhe ba ba abetsweng go tlhokomela leruo gore ba ikgodise mo botshelong. BOKHUTLO