29 Apr 2021

Mookamela  mapodisi a Middlepits mo kgaolong ya Kgalagadi Borwa, Sub-inspector Kefentse Maibi a re bogodu jwa diphologolo ga bo ba jese diwelang.

Sub-inspecor Maibi o buile jaana mo potsolotsong le BOPA, morago ga go tshwara borre bangwe ba Khawa ba roba bongwe, mabapi le go fitlhelwa ka dinama tse go belaesegang e le tsa dikukama, kwa merakeng e e gaufi le lefelo la diphologolo la KD 15.

O boletse fa ba lephata la diphologolo le makgabisa naga ba ne ba longwa tsebe ke mongwe mabapi le tiragalo eo, mme ba itsese mapodisi ba mo nakong eno ba sa ntseng ba tshegeditse bangwe ba babelaelwa bao go ba thusa mo ditlhotlhomisong.

Sub-inspector Maibi o ne a tlhalosa fa babelaelwa bao, ba ba dingwaga tse di magareng ga  masome a mabedi le bobedi le masome a mararo,  ba le ditlhopha tse tharo, mme ba tshwerwe ka malatsi a a farologanyeng.

A re ba ditlhopha tse pedi tsa ntlha, ba  tshwerwe kgwedi eno e le masome a mabedi le bongwe, mme ba setse ba tlhotlhomisitswe ba bo ba gololwa, fa ba sa boraro ba tshwerwe kgwedi eno e le masome a mabedi le bone, mme ba sa ntse ba le mo diatleng tsa mapodisi.

O boletse fa babelaelwa bao, ba tlaa itshupa fa pele ga lekgotla la ga mmakaseterata mo bogaufing.

O ne a gakolola banni ba kgaolo eo le setshaba ka kakaretso, go ikgapha mo bogodung jwa diphologolo, a re di na le seabe se setona mo itsholelong ya lefatshe leno.

E re dikgang di eme jalo, Sub-inspector Maibi o supile gape fa bogodu jwa loruo le jone bo kekela mo kgaolong ya gagwe, a kaya fa ba setse ba gatisitse dikgang tse tharo fa e sale ngwaga ono o simologa. BOKHUTLO