28 Apr 2021

Komiti ya ditlhabololo tsa motse  (VDC) ya kgotla ya Serorome kwa Palapye, e abetse sekole se sebotlana sa Kediretswe diemere tse pedi tsa dilithara tse masome a mabedi tsa pholetshe e e tshasiwang mo bodilong jwa ntlo.

Fa a amogela dimpho tse, Kgosi wa kgotla ya Serorome, Rre Samuel Maforaga o akgotse VDC go bo e rotloetsa bophepa.

Kgosi Maforaga a re VDC e arabile selelo sa sekole sa letlhoko la didirisiwa gape ba supile fa ba kgathala ka thuto ya bana.

O rotloeditse bogogi jwa sekole go tswelela ba rerisana le bone fa ba nang le tlhaelo teng, a re motho ga a thuse ka gore o abo a na le go le gontsi.

Kgosi Maforaga o rotloeditse bogogi jwa sekole go tsweledisa tshwaragano ya bone le bogogi jwa motse le komiti ya ditlhabololo tsa motse.

O supile matshwenyego ka majalwa a a dirwang mo malwapeng jaaka modaefoko, a re a dia bana go tsena sekole sentle ka gore a dirwa a bo a nwelwa fa thoko ga bone.

Fa a amogela dimpho, mothusa mogokgo Mme Dimakatso Disang a re VDC e ba file mpho e tona e e tlaa fetolang selebego sa matlwana a borutelo.

Mme Disang o akgotse VDC ya Serorome a re e bereka le bone ka dinako tsotlhe e bile ke bagakolodi ba bone.

A re VDC ya Serorome e bereka ka natla e direla sekole sa bone.

Modulasitilo wa VDC, Mme Catherine Bolele a re ba bone go tshwanela gore ba arabe selelo sa letlhoko la didirisiwa kwa sekoleng sa Kediretswe se se mo kgotleng ya bone. 

Mme Bolele a re ba dira se ka tshwaragano le kgosi le mokhanselara, a tlhalosa gore ga se la ntlha ba thusa sekole se ka e ne ya re mo nakong e e fetileng, ba ba agela ntlwana ya borutelo.

Leloko la komiti wa batsadi le baruta bana, Rre Tshoganetso Mosheti a re VDC e dira tiro e tona ya go rotloetsa thuto ya bana. 

Rre Mosheti a re ba tswelele ka go thusa puso. BOKHUTLO