19 Apr 2021

Go bolelwa fa bagolo bangwe kwa Kokotsha kwa kgaolong ya Kgalagadi ba sa tsaya mokento wa go thibela mogare wa corona beke e e fetileng.

Mongwe wa bagolo koo, Rre Hermanus Titus, wa dingwaga tse masome a ferabobedi le boraro, o tlhalositse mo potsolotsong ka Matlhatso gore ga a ikwadisetsa go kentiwa morago ga go utlwa dipolelo tse di farologanyeng ka mokento oo.

Rre Titus a re dingwe tsa dipolelo tseo ke gore fa motho a sena go kentiwa, mme a na le malwetse a mangwe a a sa tshelanweng, mokento oo o kgona go remisa madi, mme motho a tlhoke go tsoga sentle le go feta. 

O tsweletse a tlhalosa gape fa go nnile le dipego tsa gore batho bangwe ba le babedi ba ne ba latlhegelwa ke matshelo morago ga go kentiwa.

Rre Titus a re badiri ba kokelwana ya Kokotsha ba mo tlhaloseditse botlhokwa jwa go kentiwa le bodiphatsa jwa go tlhoka go tsaya mokento oo ka botlalo, mme a ikgethela gore a  seka a kentiwa. 

A re go botoka go tlhokafala ka fa tlholegong go na le go tlhokafala a sena go tsaya mokento.

Kgosi wa Kokotsha, Mme Edith Bimbo, ene o ne a rotloetsa banni ba motse oo go tsaya mokento.

 A re mafatshe otlhe a mo letsholong la go sireletsa sika loo motho ka jalo go botlhokwa gore Batswana ba lemoge seo. 

A re o ne a ikwadiseditse go tsaya mokento oo, mme ga a a ka a kentiwa beke e e fetileng ka lebaka la gore palo ya batho ba ba neng ba ikwadisitse mo motseng oo e ne ya seka ya goroga kwa go lesome, a tlatsa ka gore ka letsatsi la go kenta go ne ga tla bagolo ba le babedi fela.

O tlhalositse gore ba botsogo ba supile fa go sa kgonagale gore ba kente palo e e ko tlase ga lesome ka gore mokento o ka senyega. 

Kgosi Bimbo a re ga a itse se se ka tswang se iteile batho tsebe gore ba seka ba ya go tsaya mokento ka letsatsi le le beilweng, le ntswa ba ne ba ikwadisitse.

 A re o lemogile gore go na le bangwe ba ba rotloetsang batho gore ba seka ba ya go kentiwa ka gore mokento oo o ka tswa o bolaya. 

O ne a gakolola banni gore ba seka ba itewa tsebe ke dikgang tse, a tlhalosa fa ba botsogo ba tsweletse ka go kenta, a re fa mokento oo, o ne o bolaya, ba botsogo ba ka bo ba sa bolo go o emisa.

Kgosi Bimbo a re lengwe la mabaka a gore bangwe bogodi ba ba neng ba ikwadiseditse go tsaya mokento ba seka ba ya go o tsaya e ka tswa ele gore ga ba utlwa gore mokento o tsewa leng, ka gone go sena segoagoe go ba gakolola. BOKHUTLO