18 Apr 2021

Mopalamente wa pele wa Mahalapye Botlhaba, Mme Botlogile Tshireletso, a re go nna le bonno go neela motho seriti.

O buile se kwa Mahalapye ka Labone kwa pulong semmuso ya matlo a a neng a agiwa ke khamphane ya Thama Services.

Khamphane e agetse boora  Ditlhojane le boora  Eti matlo, fa boora Katjiwa bone ba agetswe ntlwana ya boithomelo. 

Thama Services e agile morago ga gore komiti ya ditlhabololo tsa motse ya Mahalapye Central e kope dithuso.

Mme Tshireletso a re go thusa ba bangwe ke sekao sa gore go na le mowa wa kutlwelo botlhoko

A re puso e ka se kgone e le nosi, ka jalo a rotloetsa gore botlhe ba tsenye letsogo mo go thuseng ba ba tlhokileng lesego.

Mopalamente wa pele a re go na le botlhoki jo bo dirwang ke batho ka bomo, a supa gore, go na le gore motho a lebelele bokamoso jwa gagwe o fetsa madi a gagwe mo nnotaging. 

Mme Tshireletso o lebogetse komiti ya ditlhabololo tiro e e dirileng.

Modulasetilo wa komiti ya ditlhabololo, Rre Boniface Disho, a re ba ne ba kopa thuso mo dikhamphaneng ka go farologana mme Thama Services ya araba selelo sa bone.

Rre Disho a re keletso e ne e le go aga ntlo ya dikamore tse tharo mme Thama ya kopa gore mo boemong jwa ntlo ya dikamore tse tharo e le nngwe go thusiwe malwapa a le mabedi.

A re morago ga kago ya matlo ao, ba ne ba tswelela ka go kopa dithuso gore matlo a seka a abiwa fela a sena sepe mo teng, mme khamphane ya Broadway Motors ya rekela beng ba matlo ao dijo. 

Moemedi wa Thama Services, Rre Kabelo Sebele, o supile fa ba le motlotlo gore ba bo ba kgonne go thusa.

A re maikaelelo a bone ke go tlhabolola botshelo jwa motho, mme ba simolola fela ka go fa motho bonno jo bo siameng.

Rre Sebele o kopile komiti ya ditlhabololo go kokota mo dikhamphaneng ba batla thuso gore ba kgone go namola ba bangwe mo lehumeng.

Rre Kamogelo Eti o lebogetse mpho ya ntlo le dijo, a supa fa a itumetse  ka gore ga a kgone go itirela ka ntlha ya botsogo jwa gagwe.

Rre Mphemelang Letsweletse, yo e leng moagisanyi, o kopile bana ba lelwapa leo go tlhokomela ntlo e ba e abetsweng, a ba kopa gore le bone ba itsose ba kgone go oketsa se ba se diretsweng.

Mogolwane wa lephata la boipelego kwa khanseleng ya Mahalapye, Rre Ketumile Motlhagodi, o lebogetse se Thama Services le Broadway Motors ba se dirileng, a tswelela ka go kopa gore ba ba kgonang ba tsenye letsogo ka go supega fa botlhoki bo le bontsi mo malwapeng ao. BOKHUTLO