11 Apr 2021

Kgosi Keamogetse Mokhiwa wa motsana wa Makgalo mo Bokone Bophirima o lebogile Tautona Dr Mokgweetsi Masisi go bo a mo abetse phoko.

Kgosi Mokhiwa o lebogile jaana ka Matlhatso fa phoko eo e ajwa ke Mothusa Tona wa Temo-Thuo le Tlhabololo Dijo, Mme Beauty Manake mo boemong jwa ga Tautona Masisi.

A re o lebogela thotloetso ya ga Tautona mo baruing ba banana le bagolo ka go lekana.

Kgosi Mokhiwa, yo o dingwaga di masome a marataro le borobabongwe, o supile fa a sale a rata temo-thuo a le monana.

A re o ne a fiwa dipodi di fera bongwe ka 2017 ka lenaneo la LIMID mme ka go tlhoka lesego tse tharo tsa aswa.

Le fa go ntse jalo, a re dipodi tsa gagwe di ne tsa ata mme gompieno di lesome le borataro le dipotsane tse nne e bile a re o dumela di tlaa ata go feta foo.

A re o lebogela phoko eo ya Kalahari Red go menagane.

Mo go la gagwe, Tona Manake o kaile fa phoko eo e le mpho go tswa mo go Tautona Masisi yo e leng mmampodi wa Tebelobele ya Setshaba ya 2036.

Ka jalo, Mme Manake o ne a supa fa keletso ya ga Tautona  e le go bona barui ba dihutshane ba atlega. Bokhutlo