06 Apr 2021

Molemisi mogolo wa kgaolo ya Kgalagadi, Rre Sebopeng Resheng, a re go begilwe tsie gaufi le lecha la Kang ka Tshipi.

Rre Resheng o tlhalositse mo potsolotsong fa tsie eo, e e leng borokwa ka mmala le matlhasedi a mantsho, e le lantlha ba e bona mo kgaolong ya bone ya bolemisi.

O ne gape a tlhalosa fa go na le dipego tsa matlhasedi mangwe a yone gape kwa Lokgwabe.

A re ba ne ba begela ofisi ya twantsho le thibelo diji, mme le bone ba feta ba supa fa e ne e le lantlha ba bona mofuta oo wa tsie, mme a tlhalosa fa baitseanape ba e tseetse kwa matlhatlhobelong kwa Gaborone go ya go dira ditshekatsheko tse di tseneletseng.

Rre Resheng a re le ntswa lesika la tsie le tumile ka go senya mo masimong, ka lesego e e sa tswang go begwa a e thibeletse thata mo setlhatshaneng sa mongana.

O tlhalosiste fa ditshekatsheko di santse di tsweletse go bona bokete jwa tshenyo, a tlatsa ka gore ga ba ise  ba amogele dipego dipe tsa tshenyo ya tsie go tswa kwa baleming. 

Rre Resheng o ne a kopa balemi go tsibosa selemisi fa ba ka lemoga tshenyo nngwe. BOKHUTLO