29 Mar 2021

Go tswa bogologolong Batswana ke batho ba ba ruang dikgomo. 

Bangwe ba ruela dikgomo go itshetsa fa bangwe ba do ruela seriti.

Bontsi jwa ba ba ruileng dikgomo e nna ngwao mo go bone gore e re moso le moso ba game pele ga ba di bolotsa. 

Mashi ao gantsi a a nowa, a tshelwa mo mogodungwaneng, a shaba bogobe kgotsa go dira madila.

Kwa masimong a Nkgalo gaufi le Mogorosi mo kgaolong ya Legare, Mme Gasebatho Monyatsi ke mongwe wa barui ba ba saleng ba rua dikgomo bogologolo mme moso le moso badisa ba gagwe ba a gama mme e re morago a dire madila.

A re o ne a simolola go dira madila fa a simolola go rua dikgomo mme mo dinakong tsotlhe o dira madila a bo a a rekisetsa ba ba itshetsang ka go a rekisa.

A re o ba rekisetsa madila ka tlhwatlhwa e e kwa tlase gore e re ba a rekisa jalo ba kgone go bona dipoelo.  

Mme Monyatsi a re madila ke sejo se se tswang kgakala Batswana ba se dira mme ba se je kana ba shabe ka sone. 

A re o gakologelwa gore fa a santse a le mmotlana ba ne ba kgona go ja madila ka mo nakong ya teng madila a ne a ntse a tlotlilwe fela jaaka mo nakong eno.

A re motho a seka a tsaya fela gore go dira madila go motlhofo mme gore motho a a dire go batla a a dira ka matsetseleko go itsa gore a tswe mo tatsong ya one. 

A re madila gape a tshwanetse go direlwa mo tikologong e e phepa.

O tlhalositse fa a dira madila a tshela mashi mo sekupung sa 50 litres a bo a a baya malatsi a le mane a a khurumetse. 

A re mashi ao, a tlaa bo a rema mme a bo a nna le metsinyana a a botlhoko. 

A re morago ga moo mashi a a remileng ao a tlaa bo a tshelwa mo lekukeng le le tlaa tlhotlhang tlhowa eo gore go sale madila. 

Kgetsi eo e pegwa mo setlhareng gore e kgone go ntsha tlhowa, sentle.   

O supile fa madila a na le kgwetlho ka a sa tshelwe fela mo lekukeng mme o tshwanetse o a tshele o itse gore o a tshela a le mo seemong sefe, ka jalo a re a batla motho yo o nang le kitso ya go a dira.  

Mme Monyatsi a re madila a jewa thata ke Batswana ka go farologana, a supa fa bangwe ba a tsenya sukiri go a timola botlhokwana fa bangwe ba a aja fela a ntse jalo.

A re le ene fela jaaka ba ba rekang madila mo go ene, bonnyennyane jo a bo bonang mo go bone o kgona go reka melemo ya dikgomo mme madi a mangwe o kgona go itshetsa ka one.

Mongwe wa bangwe ba ba itshetsang ka go gweba ka go rekisa madila Mme Keneilwe Daniel wa dingwaga tse di masome mararo le boraro o supile fa a rekisa madila mo marekisetsong a Serowe mme a nna le dipoelo tse di mo kgotsofatsang.

A re o reka madila kwa moruing mongwe wa dikgomo yo o mo rekisetsang a le mantsinyana kwa masimong a Moko go bapa le Paje mme a tle go a rekisa.

A re ga a ipone tsapa ka moso mongwe le mongwe o ya kwa marekisetsong a Serowe mme letsatsi le letsatsi o nna le bareki. 

A re madi a go rekisa madila a mo thusa ka a kgona go ithekela dijo kana sengwe se a se tlhokang kwa lwapeng.

Ntswa Mme Daniel a ruile dikoko tsa nama, a re bonnyennyane jo a bo bonang mo go di rekiseng ga bo a lekana mme o ne a bona go le botoka go rekisa madila go oketsa letseno la gagwe ka a rekwa thata. 

A re emere ya 20 litres e kgona go fela mo letsatsing.

Mme Karabo Lekang wa Mogorosi le ene fela jaaka Mme Daniel a re o gweba ka go rekisa madila mo motseng. 

O supile fa a tsamaya mo motseng tsatsi le letsatsi ka le ene a lemogile fa batho ba santse ba rata madila. BOKHUTLO