15 Mar 2021

Mowa wa boipelego, o o tsweletseng ka go nyelela mo Batswaneng ka monokela, ke letshego le le botlhokwa le batho ka bongwe ka bongwe ba ka agelang matshelo a bone mo go lone.

Mo malatsing a gompieno, a puso e lebanweng ke kgwetlho e tona ya tlhaelo ya madi, Motswana mongwe le mongwe o tshwanetse a gwetlhega go ikemela ka dinao go bona gore o ja mofufutso wa phatlha ya gagwe.

E re ka metlha e sa tlhole e le ya pele e go neng go itsewe fa matlo go osha mabapi, mo nakong eno mongwe le mongwe o iphitlhela a patelesega go ikgaratlhela a le nosi le ba lelapa la gagwe.

Ka jaana go nna dikobo dikhutshwane e se bogole, Mme Babihedi Mosime wa Otse kwa kgaolong-potlana ya Mahalapye o ititeile sehuba gore ga a kake a tlhola a sotlega a na le tlhaloganyo le diatla tsa go itirela. 

Mme Mosime, yo o itsegeng ka leina la Mmalekgowa, o itshetsa ka go dira a bo a rekisa mekgabisa ka go farologana.

“Tiro e ya me ya diatla ke e simolotse ka 1995 ke lekeletsa fela.

Ke ne ke kgatlhwa ke go selasela dikgonnyana ke di tshwaraganya ke bo ke di kgabisa ka matselanyana ke dira mekgabisa ya dithunya ka go farologana. 

Ka e ne e kgatlha leitlho e bile e ngoka kgatlhego ya batho mo motseng, ke ne ka lemoga fa e ka nna yone tsela ya me ya itshetso,” ga tlhalosa Mme Mosime.

Lorato lwa ga Mme Mosime mo tirong ya go dira mekgabisa lo ne lwa gola le go feta morago ga go ikwadisa kwa lenaneong la go ruta bagolo go bala le go kwala la Thuto Ga-e-Golelwe ka 1997.

Ka Ga e Golelwe e ruta ditiro tsa diatla mo godimo ga go ruta go bala le go kwala, o ne a dirisa sebaka sa fa a le mo lenaneong leo go ithuta go dira manyena le dibaga, mme se sa tokafatsa letseno le a le dirang ka jaanong a ne a simolola go rekisa dilo di le mmalwanyana go nale jaaka pele fa a ne a ikaegile ka mekgabisa fela.

Mme Mosime ka tlholego o tswa kwa Kodibeleng mme a thibeletse kwa Otse ka 2007, kwa a fetileng e tswelela a dira le go rekisa mekgabisa ya mefuta e e farologanyeng.

Tiro e ya gagwe e ne e mo itumedisa segolo bogolo ka e ne e thusa go fokotsa matlakala mo motseng ka mekgabisa mengwe a ne a e dira ka dipampiri tse di kgologolo.

Mme Mosime, yo gape a dirang megotswana le dipoto tse di lemelang dithunya, o setse a amogane kitso le monni yo mongwe wa Otse e leng Mme Motlotlegi Kwape.

Mme Kwape, yo o tlholegang kwa Letlhakane mme a tshela ka bogole a re o motlotlo ka kitso e a e anywileng mo go Mme Mosime ka jaanong a kgona go itirela madi.

Le fa go le jalo, o supile go sa itumeleng ka batho ba ba tsayang sebaka go mo duela fa ba sena go reka ka sekoloto mo go ene.

Mongwe wa barotloetsi ba tlhwatlhwa ba kgwebo ya ga Mme Mosime ke Kgosi Boithamako Keiponye wa Otse, yo a supileng fa go mo itumedisa go bo banni bangwe ba motse ba sa ikaega fela ka dithuso go tswa kwa pusong mme ba tshwere ka thata ba dira maiteko a go ogola malwapa a bone mo isong.

“Ke mo rotloetsa gore a tswelele a iteke, a ijese ka diatla tsa gagwe le tlhaloganyo e Modimo a e mo fileng. 

Le ba bangwe ke ba rotloetsa gore ba ikemele ka gore botshelo ga bo itirelwe fela ka go bereka tiro ya ofisi. 

Fa o na le tlhaloganyo ya go itshetsa o ka inamola mo tlaleng go nale go bolawa ke tlala o ntse ka diatla,” ga bua kgosi.

E ntse e le kwa Otse, sekgantshwane se sengwe se se itirelang ka diatla ke Rre Gaolaolwe Sekeleme wa dingwaga di masome mane le botlhano. 

Rre Sekeleme o itsegeng ka leina la Mapheretlha, ene o itshetsa ka ditalente ka go farologana di akaretsa go betla, poko ga mmogo le go letsa segaba.

“Talente e ya go betla ke sale ke e anyile mo go ntate. 

Ke betla dibaga, ditafole, ditilo, dipora, dikika le mekgabisa ya diphologolo. 

Ke setse ke kile ka tsenelela dikgaisanyo tsa malatsi a ga Tautona ka moopelo le poko ya me, ga mmogo le tsa ditshupo tsa kgaolo-potlana ya Mahalapye, mme ka ikgapela dietsele,” ga bua Rre Sekeleme. 

Madi a a neng a a ikgapela mo dikgaisanyong tsa ga Tautona, Rre Sekeleme o kgonne go ithekela dipodi le go tsenya bana dikole ka one, ka a fentse dikgaisanyo tse makgetho a feta lesome.

Ka 2015, Rre Sekeleme o ne a bona lesego la go ya go godisa boitseanape jwa gagwe jwa go betla kwa Madiba Brigades Centre ka thuso ya ga mmaboipelego.

Dikitso tse a di amuleng koo di ne tsa tokafatsa tiro ya gagwe mme morago a nna a gapa dietsele seboaboane kwa ditshupong tsa kgaolo-potlana ya Mahalapye.

“Le jaana ke santse ke tsweletse ka bodiragatsi. 

Gantsi ke diragatsa kwa kgotleng ka nako ya boipuso, Prisons Day le tse dingwe. 

Go tloga ka 2017, ke tseneletse dikgaisanyo tsa malatsi a ga tautona di le mmalwa mme ka ikgapela dietsele ka go farologana,” a tlatsa.

Maiteko a ga Mme Mosime le Rre Sekeleme a go tlhoka go lelala puso gore ke yone e ba jese a a itumedisa ka a supa fa Batswana bangwe ba santse ba tshegeditse mowa wa go ipelega.  Bokhutlo