10 Mar 2021

Khansele potlana ya Serowe e tshwenngwa ke batho bangwe ba ba latlhelang matlakala fa go sa lebanang.

Moanamisa mafoko wa khansele, Rre Onkabetse Ntwe, o boletse mo potsolotsong fa matlakala a a akaretsang metseto, dipampiri, dipolaseteke le leswe le le tswang fa go thubiwa matlo, a latlhelwa gongwe le gongwe fa go sa supegeng motsamao wa batho bogolo jang fa go nang le sekgwa mme a gasame le motse.

Rre Ntwe a re go a tshwenya ka matlakala bogolo jang metseto, a kgona go latlhelwa mo meseleng ya kgopo ya metsi a a leswe.

A re mokgwa o, e setse e le selo modiro mo bangweng mo ebile matlakala a leng gongwe le gongwe.

Rre Nkwe a re matlakala mangwe  a felela a jewa ke leruo le le gobeang mo motseng, pheletsong le tsenwe ke malwetse jaaka jwa mabele jo e kareng fa motho a jele nama ya seruiwa sa teng e mo lwatse.

A re go na le lefuti le go latlhelwang matlakala kwa go lone, le le tlhokomelwang ke khansele mme bangwe ba a le ikgatholosa ba bo ba kgetha go latlhela matlakala fa go sa tshwanelang.

Rre Nkwe o tlhalositse fa mo nakong eno, go dirisa lefuti la matlakala go se na dituelo dipe ka khansele e santse e emetse go ntsha dituelo tse disha tsa go latlhela matlakala teng.

A re dituelo tse di teng, ke tsa ba ba latlhang clinical waste mme ba duela P5 per kg.

Rre Ntwe o supile gape fa go tshuba matlakala le gone go tshwenya ka go sa letlelelwe.

A re fela jaaka go latlhela matlakala mo mafelong a a seng maleba, go tshuba matlakala ke molato o motho a ka atlholelwang madi a a kana ka P500 kgotsa go feta fa a ka tshwarwa a dira jalo.

Rre Nkwe a re ba ba tlolang molao ba tlaa tseelwa dikgato tse di maleba mme khansele e tlaa tswelela ka go ruta setshaba ditlamorago tsa go leswafatsa tikologo.

O ikuetse mo banning ba Serowe go dirisanya le khansele ba bo itsise ba ba maleba kana sepodisi fa ba itemogela dikgang tse. BOKUTLO