07 Mar 2021

Mookamedi wa ditirelo tsa botsogo, Dr Malebogo Kebabonye, a re dipatlisitso di supa fa Batswana ba ipaakanyeditse go amogela mokento wa segajaja sa COVID-19.

 O buile jalo ka Labotlhano fa a lekodisa babega dikgang ka tse di kgonnweng tebang le go amogela le go simolodisa mokento mo lefatsheng leno.

A re dipalo di supile fa Batswana ba feta masome a supa le boraro mo lekgolong ba ipaakanyeditse go amogela mokento.

Dr Kebabonye a re le fa dipalo tseo di  nametsa e bile di kgatlhisa, ba lemogile matshwenyego mangwe go tswa gone mo dipatlisisong tseo.

A re bangwe ba supa fa ba ka retelelwa ke go tsaya mokento ka mabaka a a farologaneng a akaretsang ditumelo ka go farologana. 

A re bangwe ba supile fa ba ka se tseye mokento ka jaana ditumelo tse ba di salang morago di le kgatlhanong le gore ba ka kentiwa.

Dr Kebabonye a re bangwe ba ba tshelang ka mangwe makoa le bone ba supile fa ba sa wele go ka tsaya mokento ka jaana ba tshoga gore gongwe o ka kgobera diemo tse ba  ntseng ba tshela ka tsone.

Go sale foo  a re dipego dingwe tse di anamisiwang mo maranyaneng ga di na nnete, mme a re le tsone di na le seabe mo ketsaetsegong ka mokento oo.

A re ka one mabaka ao, lephata la botsogo le boitekanelo le bone go le botlhokwa go anamisa molaetsa tebang le botlhokwa jwa mokento oo go babalela matshelo.

A re ba-na-le seabe jaaka dikgosi le maloko a dikomiti ka go farologana ke ba bangwe ba ba tla akarediwang go ka thusa go anamisa dithuto tse di maleba tebang le mokento.

Dr Kebabonye o gateletse  fa mokento e se kalafi  mme fela o ka dira pharologanyo go ritibatsa mogare le go fokotsa manokonoko a one.

A re fa mokento o setse o tsenngwa mo tirisong, seo ga se rebole gore melawana ya itshireletso e entseng e le mo tirisong e ka emisiwa.

A re go botlhokwa gore batho ba tswelele ka go ipipa molomo le nko, go tlhapa diatla kgapetsakgapetsa ka molora, le gone go dirisa dibolaya megare le tse dingwe.Dr Kebabonye a re lephata le  tlaa  dira maano a maleba a go bona gore bomme ba ba itsholofetseng ba ka thusiwa ka tsela efe  go ka amogela mokento le gone gore a mokento oo o siametse bana ba ba iseng ba tsholwe. BOKHUTLO