01 Mar 2021

Tona wa lephata la Tlhabololo Temo-Thuo le Tshomarelo Dijo, Rre Karabo Gare, o akgoletse balemi ba kgaolo ya Ghanzi maiteko a go nna le seabe mo go kabakanyeng itsholelo morago ga gore ba simolodise temo ya ditapole ka jaana kgaolo eo, e ne e ntse e tumile  ka thuo ya dikgomo.

Mo puisanong le BOPA, ka morago ga go etela polase tsa Silver Horizon le ya ga Rre Doeks Rothman, Rre Gare a re balemi bao ba segile tema e bontsi bo ka anyang botsipa joo go ka leka go atolosa temo-thuo mo dikgaolong tsa bone ka go farologana.

A re go dira jalo, go ka thusa lefatshe leno go menagane  e bile go ka oketsa selekanyo se le ntshang  dijo ka sone.

O ne a tlhalosa fa go tswa goo Lowe kgaolo ya Tuli Block  e ntse e le  yone e itlhomileng pele mo go tsa temo ya merogo. O supile fa dikgato tse di tserweng ke balemi ba Ghanzi di supa fa ka boammaaruri go na le kgonagalo ya  go baya lefatshe leno mo maemong a a nametsang go ka itsetsepela go intshetsa dijo.

Tona Gare a re se se dirilweng ke balemi ba Ghanzi se tshwanetse go iteelwa legofi le gone go ba ema nokeng gore ba tswelele ka bonatla joo. O bile a ba rotloetsa gore ba seka ba ipona tsapa go  amogana le puso gammogo le balemi ba bangwe maele a go godisa mhama o wa temo ya merogo.

A re go dira jalo, go tlaa thusa lefatshe leno go nna mo tshiamelomg ya go ntsha dijo tse di lekaneng mme e bile go nne le kgonagalo ya gore go fitlhelelwe mebaraka e e kwa ntle go ka thusa go oketsa letseno go godisa itsholelo ya lefatshe leno.

Rre Gare o ne  a tlatsa ka go re se balemi bao  ba se dirileng ke maiteko a mantle ka jaana bontsi bo lebanwe ke letlhoko la ditiro.  Ka  jalo a re balemi bao ba kgonne go fetlha diphatlha tsa mebereko tse ka tsone batho ba ka kgonang go itshetsa le ba malwapa a bone.

Mo mafokong a gagwe, Rre Rothman o tlhalositse fa a simolotse temo ya ditapole ka 2016 mme a tlhalosa fa e na le maduo.

A re o ne a lekeletsa ka go lema ditema tse 20 mme ngwaga o o latelang a lema 35 go tsweng foo a lema 55 mme a supa fa monogwaga a lemile 80.

Le fa go le jalo, Rre Rothman a re ba itemogela dikgwetlho di tshwana le go tsena ka mmetela ga ditapole le merogo e mengwe go tswa kwa ntle le phetogo ya loapi.

A re ba itumelela tsamaiso ya puso ka go tsenya mo tirisong melawana ya thekiso e e thibelang go tsena ga merogo e  e tswanag kwa ntle ga lefatshe leno.

 O ne a supa gape fa ba leka ka bojotlhe go lema merogo ba lebile hetogo ya loapi .

Mo go tse dingwe, Rre Rothman o ne a tlhalosa gore le mororo bolwetse jwa COVID-19 bo apesitse lefatshe ka bophara kobo ka letshoba, bo ba file monyetla wa go anama le mebaraka go ralalala lefatshe leno ka jaana go sena phadisanyo  go tswa kwa bagwebing ba ba kwa ntle ga lefatshe leno.

O ne a gwetlha balemi gore ba seka ba neela tshwene marapo mme a ba rotloetsa go ititaya ka thupana go lekeletsa methale e e tokafaditsweng ya temo-thuo, a re seo se ka thusa go godisa temo-thuo mo lefatsheng leno. BOKHUTLO