15 Feb 2021

Rre Modisaotsile Gaotingwe wa kgotla ya Maaloso mo Serowe ke mongwe wa bagwebi ba ba saleng ba simolola go gweba ka go dira dipitsa tse di jwalelang ditlhare tsa mekgabisa mme o eme ka mokgwa o le mongwe.

Dipitsa tse tsa gagwe o di dira a tlhakanya motswako wa semente le motlhaba mme e dire dipitsa tsa dipopego tse di farologanyeng.

Fa a fetsa go di dira jalo, o di penta ka mebala ya dipente ka go farologana gore di kgone go gapa leitlho la ba ba ratang go jwala ditlhare tsa mekgabisa.  

Rre Gaotingwe o buile mo potsolosong gore pele ga a dira kgwebo ya gagwe o ne a kgweetsa dikoloi tsa megobagoba mme pelo ya gagwe e ganana le tiro eo ka lerato la gagwe le ne le le mo kgwebong e a e dirang mo nakong eno.

A re o ne a tlogela tiro ya go kgweetsa dingwaga tse di lesome le botlhano tse di fetileng mme a simolola go dira tiro ya gagwe e a neng a na le lerato mo go yone, ya go dira dipitsa tse di jwalelang ditlhare.

E re ka e ne e le gone a simololang tiro eo, Rre Gaotingwe o ne a ithuta mo go ba bangwe ba ba dirang dipitsa tse di jwalelang ditlhare mme a kgona go dira go fitlhelela a dira bontle jo a bo dirang mo nakong eno.

A re go dira dipitsa tseo go tlhokana le gore motho a bo a na le tlhaloganyo e e bulegileng ka a tshwanetse a akanye gore a ka dira mo go ntseng jang mo go tlaa ratwang ke batho.

O ne a tlhalosa fa a reka tse di farologanyeng di tshwana le mebanki e e tsenyang diaparo, diemere, dibata le tse dingwe go tsaya sebopego sa se a batlang go se dira.

A re fa a sena go duba motswako o o dirang dipitsa tse di jwalelang ditlhare o o tshela mo go se a batlang go tsaya sebopego sa sone a bo a emela gore motswako oo o ome mme e re o sena go oma a bo a o ntsha.

O supile fa batho ba le bantsi mo Serowe ba mo rotloetsa ka go reka se a se dirang mme sebe sa phiri ke gore mo dinakong tse dingwe o tlhokana le madi a go reka semente le gone go reka motlhaba mme o leka ka bojotlhe gore a nne a na le tse a di tlhokang gore a seka a fetwa ke monyetla wa go rekelwa.

Rre Gaotingwe o ne a tlhalosa fa tiro e ya gagwe ya diatla  a e direla mo lwapeng mme a sa latlhegelwe mo go kalo ka a sa patelesege go duela madi a phiriso kgwedi le kgwedi.

A re ntswa e rile ka nako ya thibelo metsamao mo ngwageng o o fetileng bontsi jwa dikgwebo tsa amega, ya gagwe e ne ya seka ya amega mo go kalo ka e rile go thibetswe metsamao jalo a tswelela a dira tse di farologaneng mme fa go sena go bulelwa bareki ba gagwe ba tla ka mmetela go reka mme a kgona go tsenya madi a a botoka.

A re dipitsa tse a di dirang di farologana ka selekanyo le ka madi ka di simolola fa go P80 go ya kwa go P450 go ya ka gore e botona bo kae.

O ne a supa fa tse a di dirang di kgona go mo tshetsa e bile a kgonne go dira di le dintsi ka madi a a a bonang mo kgwebong ya gagwe ka a godisitse bana a ba a ba duelela sekole le gone go tsamaisa botshelo jwa gagwe.         

O ne a rotloetsa ba mo nakong eno ba senang se ba itshetsang ka sone go sekaseka gore ba ka dira tiro e fe ya diatla. 

A re tiro ya diatla fa e tlhoafalelwa e ka tlodisa motho melapo le melatswana mme bangwe ba a e nyatsa. Bokhutlo