11 Feb 2021

Banni ba Mbalambi kwa kgaolong ya Bokone Botlhaba ba re ga ba robadiwe ke ditonki tse di sailang mo motseng.

Mo potsolotsong bosheng, Kgosi Bernard Mbalambi, o tlhalosiste fa beng ba ditonki ba sa di tlhokomele, ka jalo di felela di saila.

 A re ditonki, jaaka leruo lepe fela, di tshwanetse go tlhatlhelwa, go itsa tshenyo e di e dirang mo malwapeng.

Kgosi Mbalambi a re ditonki di tlatsa leswe kwa mapakong a go orelwang molelo kwa kgotleng, a tlatsa ka gore ba setse ba kile ba kopana le morafe go ba kopa gore ba tlhokomele leruo, segolo bogolo ditonki, mme go sa tswa maduo ape.

Kgosi Mbalambi o tlhalositse fa ditonki gape di ka baka dikotsi tsa tsela. 

Mo go tse dingwe, o kopile balemi go agelela masimo a bone go itsa gore leruo le tlhagele, a tlatsa ka gore go le gantsi dikgang di nna dintsi ka nako ya temo, ka go bo batho ba sa tlhokomele di tsa bone.

O buile fa a kgotsofaletse temo ya monongwaga, a supa fa batho ba santse ba tsweletse ka go lema.

Kgosi Mbalambi o ne a tsibosa balemi go itlhaganelela go roba, go itsa tshenyo e e ka bakwang ke ditlou, ka wa Mbalambi e le mongwe wa metse e ditlou di e etelang ngwaga le ngwaga, go nwa metsi le go ja dijwalo mo masimong.

A re mo nakong ya gompieno, ditlou ga di tle mo motseng ka lefatshe le santse le le bokgola, ka ntlha ya dipula tsa matsorotsoro. BOKHUTLO