09 Feb 2021

Molemi wa magapu kwa masimong a Kugae go bapa le Mmashoro kwa kgaolong ya Legare, Rre Edwin Moreri, o lela selelo sa khuranyo ya meno ntateng ya tshenyo ee dirwang ke dinoko.

Mo potsolosong ka Mosupologo, Rre Moreri o ne a supa fa dinoko di dira tshenyo e ntsi,  selo se a reng se amile thobo e a neng a e solofetse.

A re ka mafelo a beke o ne a lemoga fa go na le sengwe se se jang magapu a gagwe thata.

Rre Moreri a re o ne a lemoga fa magapu a gagwe a tlhasetswe ke phologotswana e gotweng noko.

A re go ngomola pelo ka e ne e rile mo malatsing a le mabedi ga jewa magapu a le masome a le mabedi le botlhano.

A re ba ne ba dira maiteko a go batla mesima ya diphologolo tseo, mme fa ba sena go e bona ba retelelwa ke go di bolaya kana go di koba ka di ne di le mo mesimeng.   

Rre Moreri, yo o lemang temo ya nosetso mme a lema magapu a bangwe ba a bitsang a sekgowa, a re ke temo ya boraro a lema magapu ao mme o lemogile fa a busetsa go na le a a tlwaelesegileng a Setswana.

A re o simolotse go lema magapu a e le tekeletso fela ka a ne a tlwaetse go lema merogo fela mme a lemoga fa a rata mmu wa tshimo ya gagwe ka mo temong ya ntlha ya tekeletso a ne a nna mantsi mme a kgona go dira dipoelo tse di nametsang go feta tse a di bonang mo temong ya merogo.

Ka jalo Rre Moreri o ne a kgothala mme a lemoga fa magapu ao a ka mo thusa go dira dipoelo fa a ka tswelela a a lema le merogo e a ntseng a e lema.

O supile fa magapu a sekgowa a sa tshwane le a Setswana ka a le sukiri thata ebile a kgona go nna sebakanyana a sa senyege.

A re magapu a gape a batla motho yo o pelotelele ka a batla a butswa pele gore le ba ba a rekang ba utlwe monate wa one.     

O supile fa a sena mathata le kwa a ka a rekisang teng ka go na le bangwe ba ba kgonang go a tsaya ba ya go a mo rekisetsa kwa Orapa, Malatswai, Serowe le kwa Gaborone mme a fela ka ponyo ya leitlho.A re mo nakong tse dingwe o kgona go ema mo tseleng e e yang Orapa a rekisetsa ba ba leng mo mosepeleng mme ba a reka ka dipalo tse di kwa godimo. 

Rre Moreri a re magapu a dira sentle fela thata ka nako ya selemo mme fa pula e na thata a kgona go kgoreletsega ka a sa batle metsi a mantsi.   

O ne a gakolola balemi ka ene go lekeletsa magapu a mofuta o sele go na le a a tlwaelesegileng go bona gore a ba ka seka ba bona dipoelo tse di botoka.

Le fa go ntse jalo, moanamisa mafoko mo lephateng la tlhabololo temo-thuo le tlhomamiso dijo kwa kgaolong ya Legare, Rre Clifas Kemiso, o ne a gakolola balemi gore ba tsibogele go itsise balemisi ka sengwe le sengwe se ba se bonang mo temong ya bone jaaka diji kana diphologolo tse di tshwenyang mo masimong a bone gore ba nne le kitso ka tse di diragalang mo temong.

A re fa ba tshwenngwa ke diphologolo ba tshwanelwa ke go itsise ba lephata la diphologo gore ba ba fe dikgakololo tse mabapi le mofuta wa diphologolo tse di ba tshwenyang mo masimong. BOKHUTLO