28 Jan 2021

Poko ya Setswana ke bontlha bongwe jwa ngwao e e santseng e tshwareletse.

Mmoki o kgona go  boka ka botswerere le mabela, a supa boitumelo, ngongorego, tsiboso, kopo, thotloetso, bolope, lerato kana thuto.

Mo nakong eno, motho o ka dirisa talente ya poko go itshetsa, ga mmogo le go supa bokgoni jwa bone.

Rre Kalayakgosi Kalayakgosi wa dingwaga tse di masome matlhano le bosupa le mohumagadi wa gagwe, Mme Naomi Kalayakgosi wa dingwaga tse di masome a matlhano, ba kgotla ya Basimane boora Khumo kwa Serowe, ke bangwe ba baboki ba tlhwatlhwa.

Bobedi jo, bo tsweletse sentle ka go supa bothakga le talente ya bone ya poko, ka ba boka mmogo, go na le motswako wa katara le segaba.

Mo potsolotsong le BOPA bosheng, ba boletse fa ba sa tswa go ntsha kgatiso ya bone ya poko, e e bidiwang Koma-a-Sechaba, e e nang le maboko a fera bobedi.

Boora Kalayakgosi ba re ba simolotse tiro ya bone ya go kwala maboko ka ngwaga wa 2017, mme ka 2020, ba ya go a gatisa, ba bo ba a ntsha semmuso ka kgwedi ya Phalane.

Ba ipitsa Royal Poetic Affair, mo mererong ya bone ya poko, e bile ba ikwadisitse semmuso le ba Company Intelectual Property Authority (CIPA).

Rre Kalayakgosi a re tsotlhe ba di dirile ba ntsha madi mo dikgetsing tsa bone, ka ba ne ba rata poko bobe, ebile ba sa batle e nyelela.

A re ba ipapatsa ka maranyane a Facebook le ka go bua ka molomo, mme mo bagaufing, ba tla isa kgatiso ya bone ko diromamoweng tsa lefatshe leno.

Rre Kalayakgosi a re o sale a kgatlhegela go boka a sa le mmotlana kwa morakeng, a rutwa ke matlhogotshweu a ditswerere tsa poko jaaka Rre Malema Modise, yo o neng a rata poko, ga mmogo le bodiragatsi jwa metshameko mengwe le go tlhaba mainane.

O boletse fa se, e ne ya nna toro ya gagwe, gore a tswelele pele a ntse a diragatsa ka e bile a rata puo ya Setswana le go tshameka ka mafoko.

A re o ne a nna mongwe wa ba ba neng ba diragatsa thata ka malatsi a ipelelo boipuso jwa Botswana kwa kgotleng kgolo ya ga Mmabesi a Khama kwa Serowe.

Mme Kalayakgosi a re ene o tsere botswerere jwa go boka mo monneng wa gagwe, a tlhalosa fa ka nako ya lenyalo la bone, ba ne ba makatsa boidiidi jwa batho fa motsamaisa tiro a re ba ipolele gore ba kopane jang, kae, ba bo ba tsatsankana ka poko.  

Boo-babedi ba re ba setse ba kile ba tsena dikgaisanyo tsa bodiragatsi tsa malatsi a ipelelo ditiro tse dintle tsa badirelapuso ka fa letlhakoreng la poko, mme ba nna bangwe ba bafenyi. 

Rre Kalayakgosi o ne a ikgapela madi le setlankana, fa  mohumagadi a ne ikgapela kopi mo dikgaisanyong tsa kgaolo ya legare.

 

Rre Kalayakgosi ke mmaakanyi wa dikoloi (mechanic) kwa lephateng la puso la CTO kwa Serowe fa mohumagadi e le mokwaledi kwa ofising ya thuto mo kgaolong-potlana ya Serowe. BOPA