26 Jan 2021

Molemi wa  masimo a Dinyonyaneng kwa Goo-Tau, Rre Baatweng Mabihi  o rotloeditse balemi go lema ka dipula tsa ntlha ka se se dira gore ba nne le thobo e e nametsang ka mohama wa temo-thuo e le one o ba ka kgonang go itshetsa ka one.

O buile jaana ka Labotlhano mo potsolosong kwa masimong ao.

O tlhalositse fa a sa le a lemile ka Ngwanaatsele ka dipuala tsa ntlha.

A re o lemile diekere di fera bongwe, a lema magapu, ntshe, maphutshe, marotse, dinawa, mmidi magareng ga tse dingwe.

A re ka gale o lema diekere di le masome a mane mme mo nakong ya gompieno a setse a lemile diekere di fera bongwe ka ga a ke a lema tshimo yotlhe ka nako e nngwefela.

O tlhalositse fa a ipaakanyetsa go lema ditema tsa bofelo.

A re o dira se gore a seka a nna le tiro e ntsi ya go roba dijalo tsotlhe ka nako e nngwefela.

Rre Mabihi a re diji jaaka seboko sa segopa se se jang mmidi, le nonyane ya thaga, di ka dira gore molemi a tswe fela a iphotlhere mo temeng ya mabele.

A re kgwetlho e nngwe e a e itemogetseng ke mhero o tshwana le khonkhoroso le makgae a namane.

Ka setshwarwa ke ntsa pedi se se thata, o supa fa a thapile bathusi ba ba tlhagolang ba fera bongwe.

Rre Mabihi o tlhalositse fa e le ene a itemetseng ka a na le terakere le didirisiwa tsa temo.

A re o lemetse batho ba feta masome a mabedi mo pakeng eno ya temo gore le bone ba tle ba obe letsogo. BOKHUTLO