26 Jan 2021

 Rre Jacob Tshipo wa kwa Goo-Tau o abetse bana ba masiela ba le masome a mabedi le bosupa kwa dikoleng tse dipotlana tsa Goo-Sekgweng, Goo-Tau, Manaledi, Matlhokola le Modungwane melora.

Rre Tshipo, yo e leng mogokgo kwa sekoleng se sebotlana sa Boipuso, kwa Palapye, o ne gape a ba duelela madi a ditlhabololo le a mokgabo a ngwaga otlhe, ka maikaelelo a go tokafatsa thuto ya bone.

A re maikaelelo a gagwe ke go ba thusa mo go tsa thuto, gore ba seka ba tlhoka sepe go fitlhelela ba fetsa lokwalo lwa bosupa.

A re o rotloetsa mowa wa phadisano mo thutong, magareng ga dikole tse tlhano tseo ka a na le dietsele tse pedi tse ba tsileng go di phadisanela.

Mogokgo wa Goo-Sekgweng, Mme Tapologo Gaebolae a re Rre Tshipo o na le  lorato, e bile o eletsa gore Batswana ba bangwe ba anywe se mo go ene, go nna tshaba e e lorato, gape e le kutlwelobotlhoko.

Modulasetilo wa lekgotla la batsadi le barutabana kwa Goo-Sekgweng o ne a mo eleletsa masego le matlhogonolo, fa mogokgo wa Goo-Tau, Mme Cecilia Madibela a ne a leboga Modimo go bo o file Rre Tshipo botlhale, mowa wa lorato le go thusa.

Mongwe wa batsadi kwa Goo-Tau, Mme Kebadire Moikotlhai o ne a rotloetsa Rre Tshipo go tswelela ka mowa wa lorato, mme a kopa gore Modimo a mo okeletse malatsi a botshelo.

Mogokgo wa Manaledi, Mme Kebarileng Obonye a re e re ntswa sekole seo se le  sennye, se dira bontle mo ditlhatlhobong.

A re bodiredi jwa sone le batsadi ba tshwaraganetse thuto ya bana ka mowa o le monngwefela.

Kgosi Batwaetse Mapulane wa Manaledi o ne a lebogela tiro e Rre Tshipo a e direlang bana, mme a rotloetsa batsadi go dirisa dimpho tseo go tlhokomela bana. BOKHUTLO