25 Jan 2021

Banni ba Metsibotlhoko mo kgaolong- potlona ya Letlhakeng ba akgotse lekoko le le romilweng ke Tautona Dr Mokgweetsi Masisi go di goga kwa pele mo go laoleng kanamo ya segajaja sa bolwetse jwa COVID-19.

Mafoko a a boletswe ke Kgosi Bafentse Moatshing wa Metsibotlhoko, fa a amogela baeng kwa phuthegong e e neng e biditswe ke mopalamente wa Takatokwane, Rre Friction Leuwe.

Kgosi Moatshing o supile fa lekoko leo le tsenya matshelo a lone mo diphatseng mme ba kgathalela matshelo a Batswana segolobogolo.

O tlhalosistse fa mathata a le mo bathong ba ba sa dumeleng gore mogare o o a tshela le ntswa o ganyaola batho. O  supile fa Batswana ba kile ba rata go nyelediwa ke HIV ka ntlha ya boganana.

Kgosi Moatshing a tlhalositse fa Batswana ba ne ba gana go dirisa diatlana fa ba tshwara balwetse ba AIDS mme ba a swa ka bontsi.

O ne a kopa Batswana go sala ditaelo tsa ba botsogo morago tsa go tlhapa diatla, go ipipa molomo le dinko le gone go emisa metsamao e e sa tlhokafaleng go tila mogare wa corona.

Mo go tse dingwe, kgosi o supile fa ba sena lepodisi mo motseng mme se se dira gore fa molao o gagamadiwa batho ba siela kwa motseng wa gagwe go ya go dira boithatelo kwa letsheng la Metsibotlhoko mme se se nnile sentsi ka malatsi a boitapoloso.

Rre Leuwe ene o ne a supa fa e rile COVID-19 e simologa ya ba tsietsa mme ba emisa sengwe le sengwe.

O tlhalositse fa ka nako eo ba ne ba kgona go bo tshwara sentle go fitlhelela ka keresemose fa jaanong seemo se tswa mo taolong.

O supile gape fa Batswana ba ne ba a fa ba botsogo thotloetso ka go itshwara sentle le go sala ditaelo morago.

O kopile Batswana gore ba seka ba ineela go nyelediwa ke mogare o mme ba rapele Modimo bolwetse bo fele.

O ne gape a tlhalosa fa a tlaa sala morago kgang ya gore Metsibotlhoko o tlhatlosiwe maemo o kgone go nna le lepodisi le mokwaledi ka jaana o godile.

Fa a ama tsa kwa palamenteng, o ne a supa fa ba dulalane le melao e le mentsinyana, a supa fa mengwe ya melao eo e le ya kgokgontsho ya bong a bo a supa fa batho ba ba betelelang batlaa kwalwa maina mme batho ba nne le sebaka sa go a bona.

O supile fa go bonala fa ngwana wa mosetsana a sa sireletsega a betelelewa le ke bone bomalomaagwe tota.

Rre Leuwe o kaile fa ba dumalane gore fa mopalamente a tswa mo phathing e a tlhophilweng a le mo go yone a ithole marapo go tshwarwe ditlhopho gape mme fa a kojwa ke phathi o tlaa tswelela a le mopalamente a sa ye kwa phathing epe.

Banni ba ne ba supa gape fa ba sale ba ntse lebaka ba sa bewe ditsha. Mme Bako Tshaila o ne a supa fa batho ba rekisa lefatshe ka tsela e e tshosang.  

E rile a araba matshwenyego a ditsha, mothusa mokwaledi wa lekgotlana la kabo ditsha kwa Letlhakeng, Mme Barona Lerotsi o ne a supa fa e le nnete go na le lebaka go sa bewe ditsha.

O kaile fa tumalano e le gore ditsha di bewe go na le ditlamelo di tshwana le ditsela, metsi le motlakase mme ka nako e go sena madi. Bokhutlo