30 Dec 2020

Mookamela mapodisi a Tutume, Superintendent Jerry Halahala, a re mapodisi a lemogile fa go na le batho bangwe ba ba ikaeletseng go ya go tshwarela maitiso a go kgaoganya dingwaga kwa masimong.

O tlhagisitse gore ba ba ikaeletseng go dira jalo ba boele kakanyo ya bone morago, e seng jalo, ba tlaa di gama ba sa di tlhapela.

Supt Halahala a re go botlhokwa gore setshaba se tshwaragane le puso go laola le go kganela kanamo ya segajaja sa COVID-19.

Supt. Halahala o kgadile a sa kgwe mathe boitsholo jwa banana bangwe ba ba sa obameleng melawana ee beilweng go lwantsha COVID-19.

Supt Halahala a re letsatsi pele ga la Keresemose setlhopha sa banana ba ba neng ba kgobokanye mo lefelong lengwe kwa Tutume se ne sa tlhasela mapodisi aa neng a leka go se phatlalatsa.

A re segopa seo se ne sa thuba dikoloi tse pedi tsa mapodisi ka matlapa. Supt Halahala a re ba tshwere mongwe wa banana ba, mabapi le tiragalo eo.  A re mapodisi a santse a latedisa kgang eo go tshwara bommata ba gagwe.

O ikuetse mo batsading go gakolola banana go ikgapha mo boitshwarong jo bo duleng mo tseleng. A re go kgobokana mme go nowa majalwa go borai ka go ka anamisa mogare wa Corona.

Supt Halahala o ne a tlhalosa gore ba tshwere batho ba le masome a supa ba ba neng ba ikgatholosa molawana o beilweng go iletsa motsamao go tswa ka nako ya bosupa mo maitseboeng go tsena ka nako ya bone mo mosong.

Le fa go ntse jalo,  o lebogile banni ba metse e welang ka fa tlase ga ofisi ya mapodisi ya Tutume go obamela dinako tsa kiletso mesepele. A re ba ketekile letsatsi la botsalo jwa morena ka kagiso. BOPA