29 Nov 2020

Mookamedi wa khamphani ya metsi kwa Kgalagadi, Rre Kabo Maforaga, a re ba tshwenngwa ke tshenyo ya diphaephe tsa metsi e e dirwang ke badirisi go nosa leruo metsi. 

Fa a bua mo potsolotsong bosheng, Rre Maforaga o boletse fa seemo seo se kgoreletsa phatlalatso ya metsi. 

A re se se ngomolang pelo ke gore ba ba senyang ba dira jalo bosigo go sena yo o ba lemogang. 

A re disinyi tseo di roba diphaephe le mafuti a a khurumeditsweng go isa metsi ka go roba dilotlele ba bo ba bula go gelela metsi, mme ba lemoge seo morago ga lebaka tshenyo e setse e diragetse.

 A re Water Utilities Corporation (WUC) e leka ka gotlhe go lwantsha seemo sa letlhoko la metsi se se kwa godimo mo kgaolong eo. 

A seo se dira gore maiteko a bone a retele ka ba thuba diphaephe tse di tswang ko didibeng tse di isang metsi ko ditankeng tse di tlhatswang metsi ao. 

A re WUC e tlaa lemoga ka go bona go putsa-putsa metsi fa tshenyo e diragetseng teng kana ba longwa tsebe ke banni bangwe. 

O tlhalositse gore ba ne ba tshwara bangwe bosheng ba gelela metsi foo, mme ba ba rolela ba sepodisi. 

A re tshenyo eo e ntsi mo Kgalagadi, mme a supa jalo gore molato oo ke o o masisi ka disinyi tseo di rontsha lephata leo go dira tiro ya lone sentle, ya go phatlalatsa metsi go a isa ko badirising. 

Moitseanape wa kgokagano ya metsi, Rre Benjamin Baitshenyetsi  ene a re go gelela metsi mo dipompong tsa bone tsa Water Utilities Corporation le mo lelwapeng go a isa ko morakeng go nosa leruo ga go letlelelwe. 

A re seo ke molato o modirisi a ka o sekelang, a tlhalosa fa bangwe ba rora metsi kana go bowser metsi a a direletsweng go nosa batho ba a nosa leruo. 

Mme ba dira seo ka bokukuntshwane bosigo.  Rre Baitshenyetsi a re bangwe fa ba ka tshokane ba tshwarwa ba le mo tseleng, ba tlhalosa gore ba tswa go gelela metsi ao ko Sedibeng sa morui mongwe e le maithamako fela.

 Mme a tlhagisa gore fa badirisi ba ka tswelela ba dira jaana, seemo seo se tlaa dira gore letlhoko la metsi mo motseng se kekele. 

A tlhalosa gape gore go dira ditshingwana tsa merogo le go jwala dithunya tse di nosiwang ka metsi a Water Utilities, ga go letlelelwe gotlhele.

 Rre Baitshenyetsi o rotloeditse gore fa motho a batla go dira tshingwana ya merogo, o ka dira jalo ka go nosetsa ka metsi a pula, a beeleditsweng mo disenkeng gore a tsene mo tankeng. 

A re fa modirisi a ka tshwarwa a dirisa metsi ka fa go sa tshwanelang ka teng (not for domestic use) ba semolao ba ka mo atlhola madi a a sa feteng P5 000. 

O tlhalositse gore seemo sa tshoganyetso  sa kiletso mesepele (State of Emergency) ntateng ya go tlhagoga ga mogare wa Corona sedirile gore bangwe ba nne boitseme go duela metsi. A tlhalosa jalo gore koporasi eo e gokeletse batho botlhe metsi ba ba neng ba kolota gore ba tle ba kgone go diragatsa go sala melao ya ba botsogo morago ya go tlhapa matsogo kgapetsa-kgapetsa. 

A re ka nako e ga ba kgaolele ope metsi lentswa ba na le dikoloto tse di ko godimo, mme a rotloetsa badirisi ba metsi gore ke maikarabelo a bone gore ba tswelele ba kgaola dikoloto tsa bone tsa metsi. 

A tlhalosa jalo gore le fa ba sa kgaole, sekoloto sone se tswelela ka go golela pele. BOKHUTLO