22 Nov 2020

Molaodi wa kgaolo-potlana ya Boteti, Rre Ewetse Selelo a re kgokgontsho e tsere phekelo e sele mo kgaolong eo. 

Rre Selelo o buile jalo fa a simolodisa thuto-puisanyo ya ya dikomiti tsa kgokgontsho ya bong e e neng e tshwaretswe kwa Mokubilo ka Mosupologo.

Rre Selelo a re kgaolo ya Boteti ke makgatlhanela thapong mme e bile e na le batho ba ba farologanyeng ba a tlhalositseng fa bangwe ba bone e le ba ba tsileng majako kwa meepong. 

A re seemo se ke sone se se  bakang  gore kgaolo e nne le dipalo tse di kwa godimo tsa kgokgontsho ka mefuta.

Molaodi a re dipalo tse di golang tsa kgokgontsho di a tshwenya, ka jalo a bolela fa  nako e tsile ya gore mongwe le mongwe a eme ka dinao go lwantsha seemo se.

A re dikgang tsa dipetelelo  le tiriso bana botlhatshwa mo go tsa tlhakanelo dikobo di a tshwenya ka di ama maikutlo a motho mme e bile di baya batho mo diphatseng tsa go tsenwa ke malwetse le  go ima mo go sa rulaganyediwang.

Mogolwane wa lephata la Bong, Rre Thabo Ogotseng a re e ne e le maikaelelo a thuto-puisanyo go leka go lemoga dilo tse di bakang kgokgontsho jaaka ditsamaiso tsa  mo malwapeng.

Rre Ogotseng a re thuto-puisanyo e ne rulaganyeditswe go leka go hema le go lemoga mekgwa ya ngwao e e rotloetsang kgokgontsho gammogo le go ruta setshaba ka mefuta ya kgokgontsho.

Sergeant Ogomoditse Molema wa lekkalana la kgokgontsho o ne a bolela fa dikgang tsa kgokgontsho di le masisi mme mapodisi a dira ka gotlhe go leka go di rarabolola ka fa go tshwanetseng ka nako tsotlhe. 

A re e le mapodisi ba lemogile fa kgokgontsho e tlhotlhelediwa ke dilo di tshwana le tiriso botlhatshwa ya ditagi e a boletseng e le kwa godimo mo lefatsheng leno.

Rre Molema a re go baka loso go tsisa bohutsana le tshotlego mo go ba ba salang bogolo jang fa ba ne ba ikaegile ka moswi. 

O ne a gwetlha batsenelela thuto-puisanyo gore ba bue le bana ka kgokgontsho ba bo ba ba lemotshe  mefuta yotlhe ya yone le di-tla morago.

Sergeant Molema a re molao o a diragadiwa le dikatlholo di teng tsa melato ya kgokgontsho ka go farologana ga yone.

A re lefatshe ka bophara le lela ka kgokgontsho ya bong, ka jalo go botlhokwa gore mongwe le mongwe a tsee boikarabelo  jwa go bua ka yone le go e lwantsha ka dinako tsotlhe.

Tautona wa lekgotla la Mokwatla wa Bomme, Mme Gosego Mmolawa o ne a bolela fa kgokgontsho  e bakwa gape ke mekgwa ya kgodiso le tiriso puo mo malwapeng.

A re keletso ya lekgotla le a le eteletseng pele ke gore go seka ga nna le kgokgontsho gope  fela, a re motho mongwe le mongwe o tshwanetse a tsaya boikarabelo .

A re nako e tsile ya gore bomme ba itse fa ba na le bokgoni jwa go ikemela, ba tlogele go ikaega fela ka borre. BOKHUTLO