10 Nov 2020

Bomme ba ngwao kwa Pitsane ba abetse bana ba basetsana mesangwana e e ka tshwarang lekgolo kwa sekoleng se sebotlana sa Dinatshana.

Mogolwane wa Bomme ba ngwao, Mme Dipuo Motshegare o tlhalositse bosheng fa ba ne ba aba dimpho tse gore ba bone go tshwanela go thusa ka fa ba ka kgonang ka teng.

O tlhalositse fa mokgatlho wa bone, o e leng wa bomme fela, o ikaeletse go dira pharologanyo mo setshabeng. O o tlhamilwe ka 2012, maitlamo e le go thusa setshaba le batlhoki mo motseng.

O kaile fa bomme ba, ba ithaopa fela, ka go dira dikoleke kgwedi le kgwedi gore ba kgone go thusa fa go tlhokafalang teng mo motseng.

Mme Motshegare o tlhalositse fa mo mokgatlhong wa bone, ba dumela gore ngwana mongwe le mongwe ke wa bone, ka jalo go botlhokwa gore ba thuse fa ba kgonang teng.

O boletse fa mokgatlho wa bone o tiisiwa ke lorato le go emana nokeng, e bile ba dumela mo go itshwarelaneng le go bua fa go na le sengwe se se sa ba itumediseng.

Mme Motshegare o supile gore ba ka itumela fa ba ka bona thotloetso mo setshabeng le makalana a mangwe go godisa mokgatlho o.

Kgosi Tiego Leshomo wa Pitsane o galaleditse bomme ba mokgatlho oo go bo ba dirile tiro e ntle ya go abela bana ba sekole mesangwana.

O tlhalositse fa a na le tshepo mo mokgatlhong, gape o ne a ba akgolela bopelotelele jwa bone mo go tsotlhe tse ba di dirang.

O supile fa mokgatlho o thusa ka nako tsotlhe mo motseng, mme a kaya fa o aga setshaba.   BOKHUTLO