20 Oct 2020

Badiri ba Spar mo Kanye ba bolokile Rre George Latelang ka matlhatso morago ga go wela ga ditlhotlhomiso tsa mapodise.

Rre Latelang o ne a fitlhelwa a tlhokafetse kgwedi e e fetileng e tlhola malatsi a le masome a mabedi le borataro mme go belaelwa fa a bolailwe ke mosi morago ga go sha ga ntlo e a neng a nna mo go yone. 

Ba Spar ba ne ba ithaopela go tlhokomela Rre Latelang go tloga ka ngwaga wa 2016 morago ga go lemoga fa go sena yo a mo tlhokomelang, ka jalo ba tsaya tshwetso ya go mmoloka go tsweledisa maikano a bone.

Mookamedi wa pele wa Spar, Mme Florence Ortell o ne a tlhalosa fa ba ne ba agela Rre Latelang ntlo ka 2016 ka lenaneo la bone la go direla setshaba.

Mme Ortell o boletse fa ba ne ba bona go tshwanela gape gore ba mo thuse ka dijo, melora, diaparo le madinyana  a itshetso ka jalo ba ne ba mo neela P600 kgwedi le kgwedi le go duela P100 wa lenaneo la phitlho kwa Lyns. 

A re mo godimo ga tsotlhe, ba ne ba mo thapela mme mongwe go mo tlhatswetsa, apeela le go phepafatsa fa a nnang teng. 

O tlhalositse fa mme wa teng e le ene yo o neng a ba bolelela ka Rre Latelang le letlhoko la gagwe mme morago ba kopana le ba kabo ditsha go kopa fa ba ka mmeelang mosasana teng.

O boletse gape fa Rre Latelang, yo o neng a tsholetswe kwa Lokgwabe ka ngwaga wa 1955, a ne a sena ope wa losika mo Kanye. BOKHUTLO