20 Oct 2020

Mothusa tona wa lephata la dikgaolo le tlhabololo magae,Rre Kgotla Autlwetse   a re  dikgosi ditla rutuntshiwa ka tsamaiso tsa ditsheko.

Fa a buisa dikgosi tsa kgaolo ya Ghanzi bosheng, Rre Autlwetse o tlhalositse  fa  ba lemogile gore  dikgosi dingwe ga di  tlhaloganye ditsamaiso tsa ditsheko ka jalo  ba bone gole botlhokwa  go tsaya kgato ya go ba  rutuntsha.

 Le fa go ntse jalo o tlhalositse fa thutuntsho e etla bo e ikaegile thata  ka go  dirisa dikgosi tse di setseng di itse tiro go ruta ba bangwe, a tlatsa ka gore  go rutuntsha   gase go isa motho kwa  sekolong  fela ka motho a kgonwa go rutwa mo tirong ya gagwe ya letsatsi le letsatsi.

A re maikaelelo  ke go bona dikgosi  di  tsamaisa ditsheko  ka manontlhotlho ba sa tsee matlhakore,  le gore ba  nne le  dikitso  tse di rileng go itepatepanya  le dipaka kgotsa diemo  tsa segompieno.

O ne a gatelela gore go a supafala gore dikgosi dingwe ga di na kitso ka ditsheko, a supa gore le dipotso   tse ba di botsang e nna ekete  ba  tsaya letlhakore.

Mo godimo ga moo ,Rre Autlwetse  a re lephata la gagwe le na le  maikaelelo a  go gokela  maranyane a ‘wifi’ mo dikgotleng, ebile dikgotla dile makgola matlhano le masome a mabedi (520) di setse di thophilwe tse go tla simololwang  ka tsone.

A re se se tla thusa dikgosi go ikoketsa dikitso tsa ditsheko ka ba tla leba dikatlholo tse di direlweng ke ba bangwe  mo maranyaneng le go ithuta melao   ka go  farologana.“Le fa a  sekisa o kgona go tsena mo maranyane  go leba ditsetlana dingwe tsa molao,” ga bua jalo Rre Autlwetse.

 A re maranyane ao gape atla  thusa le banana ba metse  eo.

 O ne a kopa dikgosi  go nna le seabe sese rileng sa go lwantsha kgokgontsho ya bong  ye a reng ga e jese diwelang. A re ba tshwanetse ba ruta morafhe ya bone boikgapho le tlotlo.

Kgosi  Mbao Kahiko III wa Charleshill le ene o ne a dumalana le Rre Autlwetse  gore dikgosi di tshwanetse  go di goga kwa pelo mo go lwantsheng  kgokgontso ya bong ka  go ruta morafhe ya bone tse di tshwanetseng.

 Kgosi Kahiko III one  gape a  galaletsa  mogopolo wa go rutuntsha dikgosi  a supa fa bangwe ba sena dikitso dipe mabapi le merero ya ditsheko mo ebileng ba beile  thatayotlhe mo  modimong fela.

 A re dikgosi  di  berekela  mo mabakeng  a a  thata, ba arametse  dipuo tse di botlha bile ba a  tshosediwa, ka jalo a re  puso e akanye go ba fa lemmenyana  le le emisetsang mabaka  a ba tshelelang mo go one  kana.

Mo mafokong  a malebo, Mopalamente wa Ghanzi Bokone,  Rre Johane Thiite o ne a getelela  botlhokwa jwa go rutuntsha  dikgosi, a re se se ka tokafatsa ditsheko e bile ba ka dira tiro ya bone ka botswapelo. BOKHUTLO