19 Oct 2020

Mothusa tona wa Lephata la Dikgaolo le Tlhabololo Magae, Rre Kgotla Autlwetse o kopile dikgosi go ilela bogosi  e seng go bo kgotlela ka sepolotiki.

Fa a buisa dikgosi tsa kgaolo ya Ghanzi bosheng, Rre Autlwetse o ne a supa matshwenyego a gore dikgang tsa bogosi di  setse di rarabolowa kwa makgotleng a ditsheko, tiro e e tshwanetsweng ke go dirwa ke morafe mo kgotleng.

A re se se tlhotlhelediwa  ke sepolotiki se se setseng se le sentsi mo bogosing.

  A re fa kgosi a hulara kgotsa  a tlogela bogosi ka mabaka a bogodi  go tshwanetse ga nna le therisanyo  le morafe  gore o tlaa tlhatlhangwa ke mang

 Rre Autlwetse a re Bogosi Act, e supa sentle gore morafe mo kgotleng ke one o  tshwanetseng   go ntsha leina le le  lengwe  gore kgosi e ka nna  mang, kgotsa fa ba feta bongwe ba dire morero gore  ke mang bo mo tshwanetseng.

O ne a tlatsa ka go re le mo bogosing jo bo tsalelwang ga se ngwana   mongwe le mongwe wa kgosi yo o ka nnang kgosi, ‘ditiro tsa gagwe  di kgona  go sa moletla jaaka  fa dikgang dingwe di le kwa makgotleng  a ditsheko kgotsa a inaakantse le ditiro tsa borukutlhi,  a supa gore motho wa gonna jalo fa a ka fiwa setilo e tlaa bo e le  go tlhapatsa bogosi.”

 A re bogosi ke selo se se sisimogwang ka gore ke seipone sa morafe, mo godimo ga moo morafe o ipela ka jone.

O ne a kgala a sa kgwe mathe  ba e a reng ba neetswe thata ya go tsamaisa morero wa go batla yo o ka tlhatlhamang kgosi ba bo ba tsaya mathakore, a re ke sone sepolotiki se se senyang bogosi.

O ne gape a supa matshwenyego a gore ntswa bogosi e le sefalana sa ngwao, ngwao  e tsweletse  ka go latlhega.

Kgosi Simon Kambura wa Makunda a re  puso e tshwanetse ya tlhama  lephata la ngwao le tsamaiso ya makgotla a Setswana  ka gore bokgosi ke bone ba tshwereng ngwao. BOKHUTLO