18 Oct 2020

Mothusa tona wa lephata la merero ya ofisi ya ga Tautona, Tsamaiso Puso le Bodiredi, Rre Dumizweni Mthimkhulu a re tikologo ke nngwe ya tse di ka gakatsang lehuma.

Rre Mthimkhulu o buile jalo ka Matlhatso fa a ntsha molaetsa wa letsatsi la mafatshefatshe la go nyeletsa lehuma, a re Batswana mo dikgaolong dingwe ba babaletswe ke lehuma ka jaana tikologo ya bone e sa siamela temo-thuo. 

Ka jalo, Rre Mthimkhulu a re Batswana ba ba iphitlhelang ba tshelela ka fa tlase ga seemo se, ba wela mo lehumeng ka ba sa kgone go roba sepe, e bile ba le kgakala le ditlamelo tse di ka tlhamang ditiro.

Go tsibogela seemo se, Rre Mthimkhulu a re puso e bonye go le maleba go dira maiteko a go sireletsa ba ba tlhokileng lesego. 

A re ba-tsaya karaolo botlhe, segolo bogolo mo mehameng e e amang tsa selegae, sepolotiki le itsholelo ba tshwanetse go tshwaraganela go tsosolosa tikologo. Rre Mthimkhulu a re mo bogompienong, puso e atolositse seelo sa go sekaseka seemo sa lehuma ka go akaretsa thutego, botsogo, boitekanelo le tse dingwe. 

O tlhalositse fa mo dingwageng tse di fetileng Botswana a ne a dirisa seelo sa letseno la madi go kala lehuma, go kgaphetswe mabaka a mangwe kwa thoko. 

Rre Mthimkhulu a re go botlhokwa go babalela mafudiso go somarela mhama wa temo-thuo ka o le tlhwatlhwa kgolo. 

O gateletse botlhokwa jwa go somarela tikologo ka kitso ya gore bontsi jwa mananeo a nyeletso lehuma ke thuo ya dihutshane, ka jalo a ikaegile ka phulo e e bonwang mo tikologong gore a itshetlele. 

“Tshomarelo tikologo ke pinagare ya dikeletso tsa rona tsa go godisa thuo ya dihutshane le metswedi e mengwe ya itshetso,” ga tlhalosa Rre Mthimkhulu.

O supile gore puso e ikemiseditse go nyeletsa lehuma ka go dira mananeo a a nitameng. 

Rre Mthimkhulu a re go boamaruri gore lehuma le tsalwa ke diemo tse di farologanyeng, ka jalo maikaelelo magolo a ditlhabololo tsa sennela ruri ke go neyeletsa mefuta yotlhe ya lehuma lehuma gotlhelele.  BOKHUTLO