14 Oct 2020

Balemi ba Letsholathebe kwa kgaolong ya Bokone Botlhaba ba eme sentle gore ba tsene mo temong ya monongwaga.

Mo potsolotsong ka Labobedi, Kgosi Gillard Letsholathebe o tlhalositse fa e rile ka letsatsi la Boipuso ba bolotsa letsema.

O supile fa e rile morago ga pula ya maloba, balemi bangwe ba ya masimong go tlhola seemo.

 Kgosi Letsholathebe a re o dumela gore fa pula e ka na gape mo bogaufing ba ka simolola go baa tema, a tlhalosa fa balemi ba setse ba remile masimo, mme ba emetse dipeo go tswa kwa balemising.

O tlhalosiste gore e rile a bolotsa letsema, a kopa morafe go tlhokomela leruo la bone jaaka paka ya temo e simolola go itsa dikgotlhang.

Kgosi Letsholathebe a re ba dikile ba sa lema ka ntlha ya pula e e boutsana, mme a re o itumedisiwa ke gore seo ga se a nyemisa moko banni ba Letsholathebe.

O tlhalositse fa balemi ba kgothatsegile go lema ka baitseanape ba tsa tepo loapi ba supile fa pula ya monongwaga e tla nna e e nametsang.

A re beng ba diterekere ba eme sentle go lemela batho. Kgosi Letsholathebe a re o ngomolwa pelo ke ba masimo a a kwa boseja ga noka ya Tati e e senang borogo, ka gore fa noka e tletse, ga ba kgone go tlolela kwa masimong. Bokhutlo