14 Oct 2020

 Mopalamente wa Serowe Borwa, Rre Leepetswe Lesedi, a re ga a bee sebete kgokgontsho ya bong.

O buile jalo fa a kopane le dikomiti tsa ditlhabololo le tsa balemi barui kwa kgaolong ya gagwe bosheng.

Rre Lesedi o boletse fa kgokgontsho ya bong e sa jese puso le morafe di welang ka gore gangwe le gape go begwa kgokgontsho ee kgonang go fela ka go tlhokafala ga batho.

A re seemo seo se na le bokgoni jwa go koba babeeletsi.

Rre Lesedi a re dipalo di supa fa borre ba kgokgontsha thata go na le bomme.

O boletse fa borre ba bolaya bakapelo ba bone, ba thubetse babo ba ithwadisa basetsanyana ba dingwaga tse di kwa tlase.

A re seemo seo se baya lefatshe leno mo kgatelelong ya gore babeeletsi ba tshabe go nna mo lefatsheng.

O boletse fa palamente e fetisitse molao kakanyetso wa kgokgontsho ya bong ebile go bopiwa komiti ee tlaa tlhotlhomisang gore dikgokgontsho di tsalwa ke eng le gore go ka sireletswa ba ba amegang jang.

Mopalamente o kopile dikomiti tseo go thusa puso le ba melao go laola seemo se se golelang pele.

O kopile borre go fetola maikutlo le mokgwa wa go kgokgontsha ba malwapa a bone. 

O boletse fa bomme ba tshelela mo letshogong

Rre Lesedi o ne gape a gakolola bomme go emisa go nna le bakapelo ba isi ba ba nyale.

O kgadile batsadi bangwe ba ba dirisang bana go lopela dijo le madi. 

A re ke sengwe sa tse di dirang gore borre ba nne bogale.

O boleletse dikomiti tsa kgaolo ka melao kakanyetso ee fetisitsweng kwa palamenteng ya mariga a balelela le wa makgetho.

Mo go tse dingwe, Mopalamente Lesedi, o rotloeditse banni go obamela melawana ya go kganela kanamo  ya segajaja sa COVID-19.

O boletse fa go santse go na le batho bangwe baba tlalang kwa dintshong e bile ba fetile palo ee beilweng.

O boletse fa go na le ba bangwe ba ba kgobokannang go nwa bojalwa.

Kgosi wa kgotlana ya Sesomakwa Serowe, Kgosi Lerato Keipiditse, o kopile puso go gagamaletsa batho ba ba kgokgontshang ba bangwe dikatlholo thata.

O boletse fa go nowa ga bojalwa le gone go ile magoletsa mme  melato mengwe ya kgokgontsho e  diragala  morago ga bojalwa. 

 Maloko a dikomiti ka go farologana one a ne a supa fa a le sebete se molangwana ka phiro ya Ipelegeng ba bolela fa e tlhakatlhakane ka gore go fetolwa melawana gantsi.

Ba boletse fa Ipelegeng e baya maloko a dikomiti tsa ditlhabololo ka fa mosing ka gore morafe o ba leba ka leitlho la kilo ba kaya fa e le bone ba e tsamaisang.

Ba kopile gore kgotlakgolo ya Gammangwato e ntsenngwe dipone ka gore bosigo gonna lefifi mme seo se ka dira gore dipampiri tsa ditsheko di utsuwe. Bokhutlo