11 Oct 2020

Banni ba Makopong ba ne ba amogela ba lephata la Water Utilities Corporation (WUC) ka mogolokwane  jaaka ba ne ba gorosa motshine o mosha o o tlaa epelang Batswana didiba go ralala lefatshe lotlhe mme o tlaa simolola kwa Makopong le Draaihoek mo Kgalagadi Borwa.

E rile ka Labotlhano ba rola motshine o, moeteledipele wa WUC mo lekalaneng la Water Resources, Rre Teddy Ditsabatho a re kompone eo, e e filweng boikarabelo jwa go phatlalatsa metsi lefatshe lotlhe ke puso, e ntse e na le motshine o o epang didiba wa borehole drilling rig o le mongwefela mme puso e ne ya re bosheng ya reka motshine wa bobedi o o lopileng P16.4 million. 

A re mo dingwageng tse di fetileng kompone eo e ntse e tlhaelelwa ke ditsompelo mme e kgonne go dirisa borehole drilling rig e nngwefela go katolola didiba tse di fetang makgolo a fera bongwe lefatshe ka bophara mme go nna le motshine wa bobedi go solofetswe go tokafatsa ditirelo tsa metsi go menagane.  

O tlhalositse gore lephata leo le ntse le epolola didiba tsa bogologolo tsa dingwaga tsa bo 1969 mme mo bogompienong le epolola tsa bo 1980.

 O ne a tlhalosa gore seo ke namane e tona ya tiro mme motshine wa bobedi o tlaa fefosa go epiwa le go katololwa ga didiba Botswana ka bophara.

Motshine oo o tlaa dirisiwa e le la ntlha kwa metseng ya Makopong le Draaihoek morago ga go dirwa ditshekatsheko mme ga lemogwa fa letlhoko la metsi le le lentsi thata teng. 

A re motshine oo o tlaa dirisiwa ke bodiredi jwa WUC go phunya metsi a go solofelwang a tlaa elela mo dibekeng.  

Rre Ditsabatho a re selelo sa metse ya Makopong le Draaihoek ga se tswe fano mme ga se a bolo go utlwala ka gore kompone eo e kile ya leka go tlhatswa didiba dingwe mo metseng eo dingwaga tse tharo tse di fetileng mme ya retelelwa.  

A re didiba tseo di ne tsa fitlhelwa di katesegetse fela thata mme ga lemosega fa di ka seka tsa ntsha metsi a a lekaneng. 

A re kompone ya WUC e setse e dirile ditogamaano tsa phatlalatso ya metsi mo khutlong tse nne tsa Botswana mme ba iphile seelo sa  go dira jalo mo dingwageng tse di masome matlhano. 

A re moalo oo wa metsi o setse o tshwantshitswe mme e bile o supa gore kgaolo ya Kgalagadi e tlaa gogelwa metsi go tswa kwa Lesotho kwa metsweding ya metsi a dithaba le kwa Namibia kwa lewatleng.

O ne a tlhalosa gore metsi a lewatle a letswai mme a tlaa ralala Ghanzi kwa a tlaa tlhatswiwang letswai teng a bo a phatlaladiwa mo dikgaolong tsa Ghanzi le Kgalagadi.

Moeteledipele wa kompone eo o tlhalositse gore metsi a didiba mo kgaolong ya Kgalagadi a tshabelelwa ke go nna letswai ntateng ya popego ya matlapa a a ka fa tlase ga lefatshe. 

Ka jalo a re metsi a a tlaa bonwang kwa Makopong fa a ka tswa a le letswai go tlaa dirwa dithulaganyo tsa gore a tlhatswiwe go nna mo seemong sa go nowa. 

O lebogetse banni ba metse eo go nna pelo telele go letela metsi mme a solofetsa gore go tlaa tsaya dibeke fela gore metsi a phunngwe. 

Moeteledipele go tswa Water Affairs, Rre Thato Setloboko o tlhalositse gore motshine oo wa modiro wa Superock 1000 o mashetla mme e bile o bereka jaaka thakadu ka gore o kgona go epa selekanyo sa 400 metres go ya kwa tlase ga lefatshe ebong selekanyo sa go dikologa lebala la kgwele ya dinao.

O tlhalositse gore fa go epiwa sediba go lebelelwa mefuta ya mebu le letlapa mme selekanyo se kgona go farologana go tswa fela gore popego ya lefatshe e ntse jang. 

A re motshine oo o ka tsaya beke go epa selekanyo sa 400 metres fa go sena dikgoreletsi dipe. 

Fa a tswa la gagwe, mopalamente wa Kgalagadi Borwa, Rre Sam Books o lebogetse puso go reetsa selelo sa banni ba kgaolo eo. 

O ne a tlhalosa gore mokhanselara wa Makopong/Draaihoek ebong Rre Moses Chimbombi o ne a lela sa ga Ragele bosigo le motshegare a kopela banni metsi. 

Ka jalo e le mopalamente o ne a rwala ditlhako go kopa matshine oo gore o simolole ka metse eo ka letlhoko la metsi le ne le ile magoletsa. 

Kgosi wa Makopong Rre Vincent Phologo o lebogetse gore metsi a tlaa goroga mo motseng mme a fedise letlhoko le le kwa godimo. 

A re go goroga ga motshine oo mo Makopong ke ditso ka o le mosha mme e tlaabo e le la ntlha o phunya sediba mo Botswana. 

O tlhalositse gore lenyora le ne le setse le tsaya phekelo e sele mo metseng eo mme a rapela gore Modimo a segofatse diatla tse di tlaa dirisang motshine oo go epa gore metsi a bonale ka ponyo ya leitlho.  Bokhutlo