01 Oct 2020

Khamphani ya Orthosurge Botswana e abetse boora-Selebogo ntlo kwa Hebron e le maiteko a go ba fa seriti morago ga gore batsadi ba bone ba tlhokafale.

E rile a bua kwa moletlong wa go abela bana bao ntlo  ka Matlhatso,  mookamedi wa khamponi eo, Rre Sehularo Motshegare, a tlhalosa fa ka thuso ya komiti ya ditlhabololo tsa motse ba ile ba utlwa ka selelo sa lelwapa leo.

Ntlo eo e na le dikamore tse pedi le ntlwana ya boithomelo le fa go apeelwang teng.

Rre Motshegare o ne a tlhalosa fa ntlo eo e tlaa neela bana bao seriti, a tlhalosa fa khamphani e ipela ka go netefatsa gore e thusa ba ba tlhokileng lesego.

O supile fa maikaelelo a bone e le go thusa Batswana go nna le bonno jwa tlhwatlhwa, a tlatsa ka gore maikaelelo a mangwe a bone ke go fa setshaba seriti.

O tlhalositse gape fa ba itlamile gore e ntse e le mo kgaolong ya Borolong,  ba ikamanye le sekole sa Borobadilepe go se thusa ka tse se ditlhokang.

E rile a amogela ntlo e mo boemong jwa khansele potlana ya Good Hope, mothusa modulasetilo wa khansele Mme Opelo Mongwa a tlhalosa fa Orthusurge e nnile tshegofatso e tona. 

Mme Mongwa o kaile fa botlhoki bo le teng mo kgaolong ka jalo go bona makalana a ntse a itlama go thusa go nametsa, mme gape a ba leboga a supa fa Modimo a tlaa ba okeletsa fela thata. 

O ne a leboga setshaba go tswelela ba thusa batho a supa fa khamphani ya Orthusurge e le sekao mo setshabeng go tlhokomela ba ba tlhokileng lesego mo botshelong. Bokhutlo