01 Oct 2020

Mokhanselara wa kgaolwana ya Boseja/Flowertown o kgaletse banni ba kgotla ya gagwe go leswafatsa tikologo.

Rre Tumelo Koolekanye o buile se bosheng morago ga thulaganyo ya go phepafatsa kgotla ya Flowertown. 

A re bangwe ba dira tikologo leswe ka go latlhela matlakala gongwe le gongwe.

Rre Koolekanye o tlhalositse fa ba gwetlhilwe ke go bona tikologo e le mo seemong se se sa itumediseng.

“A re tseyeng maikarabelo, re begele ba ba maleba fa re bona bangwe ba latlhela matlakala fa go sa tshwanelang,” ga rotloetsa mokhanselara.

A re dihutshane tse di nnang mo motseng ga di rekwe ka jaana bareki ba supa fa di sa itekanela ka gore di ja dipampiri tse di tletseng mo motseng.

O boletse gape fa babereki ba Ipelegeng ba tlaa phepafatsa lefelo leo le ntswa batho ba le dirile le go latlhelwang matlakala mo go lone. 

A re lefelo leo le ka dirisiwa e le la iketsho bodutu go na le gore go latlhelwe matlakala mo go lone.

O tlhalositse fa khansele e tlaa thapa babereki ba le masome a matlhano, kgwedi yone e go ya go ema ka Mopitlo ngwana o o tlang.

Ba tlaa bo ba itebagantse le go phepafatsa tikologo.

Fa a ntsha la gagwe, Kgosi Bofitlha Bele wa kgotla ya Kanamo, o gateletse botlhokwa jwa bophepa, a rotloetsa banni go tswelela ba phefatsa tikologo ya bone go itsa leruo la bone go ja leswe. Bokhutlo