17 Sep 2020

Mapodisi a Serowe a tlhotlhomisa mosadi mongwe mabapi le lesea le le neng le latlhetswe mo ntlwaneng ya boitiketso ya kokelwana ya Moiyabana bosheng.

Superintendent Poloko Oteng o tlhalositse fa mosadi yo a le  dingwaga tse di masome mararo le bobedi mme a tswa kwa kgotleng ya Mokale.

A re go ne go ntse go itsege mo motseng  fa a itsholofetse, mme bangwe ba hakgamala ka fa a neng jaanong a lebega ka teng.

A re ba ne ba longwa tsebe ke bangwe, mme ba mo ikatumetsa go mmotsolotsa.  

Superintendent Oteng a re ba tsweletse ka go tlhotlhomisa ba itshwaragantse le ba botsogo.

A re mosadi yo o na le bana ba le bane, mme e bile ga a dire gope.

O tlhalositse fa lesea le santse le le kwa kokelong ya Sekgoma mme le mo seemong se se nametsang.

Ngwana o ne a bonwa a santse a na le thari ke mongwe wa balwetse kwa kokelwaneng ya Moiyabana.

Superintendent Oteng a re fa go ka rurifatswa fa e le mmangwana, mmelaelwa o ka lebisiwa molato wa go hitlha pelegi le go itlhokomolosa ngwana go ya ka molao wa bana. 

O boletse gore mme yoo o santse a tlhotlhomisiwa mme fa go feditswe tsotlhe o ka busetswa ngwana morago ga tshidilo maikutlo ee tseneletseng. 

BOKHUTLO