16 Sep 2020

Lekgotla la Botswana Network of People Living with HIV/AIDS (BONEPWA) le abetse ditlhopha tse di itebagantseng le go lwantsha HIV/AIDS kwa kgaolong potlana ya Serowe melora le dibolaa megare.

Mogokaganyi wa ditirelo tsa BONEPWA, Mme Tshepang Mothombeni, a re dimpho tseo di tswa kwa lekgotleng la UNAIDS,.

A re mo nakong eno ya segajaja sa COVID-19, go botlhokwa thata go tlhapa diatla le go phepafatsa mafelo a bonno.

A re dimpho tse, di tlaa thusa go lwantsha kanamo ya mogare wa corona.

Mme Mothombeni o tlhalositse fa ditlhopha tse di dirang le BONEPWA kwa Serowe di akaretsa tsa Bokopano, Neelano le sa Marang. 

A re ditlhopha tseo di filwe dithuso ka di itebagantse le mananeo a maloko a ka itshetsang ka one  jaaka go lema merogo, go roka, go rua dihutshane le dikoko.

O supile fa ditlhopha tseo di thusa ba botsogo go lemoga le go thusa balwetse mo metseng.  

Kgosi Kuate Nkatse wa kgotla ya Mere kwa Serowe o ne a akgolela BONEPWA dimpho tseo.

A re botsogo ke mmangmang, ebile bo tla pele ga sengwe le sengwe.

Mogokaganyi wa ditirelo tsa HIV/AIDS kwa kgaolong eo, Mme Phodiso Modungwa o ne a rotloetsa ditlhopha tse di itebagantseng le HIV/AIDS go tlhwaafalela tiro ya bone ya boithaopo.

A re ba tshwanetse go netefatsa gore ga ope yo o tlhokang go tsaya diritibatsi. BOKHUTLO