13 Sep 2020

Banni bangwe ba Kalakamati ba ba direlang kwa ntle ga motse oo ba ntshitse P8 500 gore komiti e katolole letamo.

E ne ya re ka Matlhatso ba araba selelo sa motse ka go ntsha madi a a neng a setse go duela konteraka go wetsa tiro ya go epolola letamo.

E rile a bua kwa kabong ya madi ao, moeteledipele wa setlhopha sa baithaopi, Rre Boikanyo Mmolawa, a tlhalosa fa e rile ngogola ba amogela molaetsa gore batsadi ba kopa thuso ya madi a a ka duelang konteraka, ka jalo ba itlama gore ngwaga o ba tla ikgobokanya.

O tlhalositse fa e ne ya re ka Phukwi monongwaga, ba simolola go itshwaraganya le batho botlhe ba Kalakamati ba ba berekelang kgakala gore ba kopanele moono o.

Rre Mmolawa a re mo dikgweding tse tharo, ba ne ba thulanya ditlhogo go kgobokanya madi go fitlhela kwa seelong sa P8 500.

O akgotse botlhe ba ba tsereng karolo ka go ntsha madi, a supa fa e le maiteko a a kgatlhisang le fa nako e ne e le khutshwane go a kgobokanya.

Rre Mmolawa o kgothaditse basha gore mo nakong ee tlang, e nne bone ba ba gogang mananeo a ditlhabololo mo motseng kwa pele, go na le go emela bagolo gore ba kope thuso mo go bone.

O buile fa maikaelelo a bone e le go tsweledisa tlhabololo ya letamo le le kwa bophirima jwa motse.

E rile a amogela mpho e, modulasetilo wa komiti ya letamo, Rre Ernest Masala, a tlhalosa fa bana ba Kalakamati ba bone botlhokwa jwa go tlhabolola letamo le le gautshwane le motse morago ga gore batsadi ba supe fa ba tlhaelelwa.

A re maikaelelo a bone e ne ele go katolola mmu le go oketsa sekgala sa lone le go tsosa terata.

Rre Masala a re fa nako e ntse e tsamaya, ba ikaelela go reka mokoro gore ba o epele kwa ntle ga letamo go nosa dikgomo, go itsa go kgotlelesega ga letamo.

O tlhalositse fa e rile ngogola morafe wa ikana go ntsha madi go katolola letamo mme ba tlhaelelwa go goroga kwa seelong sa P16 400 se se lopilweng ke konteraka.

Modulasetilo o tlhalositse fa konteraka e ne ya epa mme ya seka ya wetsa tiro ka ntlha ya pula, ka jalo ba dumalana gore e tlaa wetsa tiro fa ba sena go kgobokanya madi aa neng a saletse kwa morago.

Rre Masala a re kgwetlho e tona mo motseng ke gore letamo le lengwe le kgakala, ka jalo o lebogetse batho ba Kalakamati ba ba ntshitseng madi a tlhomamisa fa tiro e tla a wela.

Mokhanselara wa Kalakamati, Rre Zibani Mbalambi, o akgoletse batho ba Kalakamati, a supa fa e se mang le mang yo kgonang go simolodisa sengwe se be se wele.

Rre Mbalambi o buile fa a utlwile gore matamo a mabedi a mo motseng a tsisitse kgotlhang, ka jalo a kopa gore kgang e e rarabololwe, ka bana ba motho ba ka se kgaogangwe ke matamo.

A re ditlhabololo tsotlhe mo motseng ke tsa mongwe le mongwe eseng tsa ga ope, ka jalo a sa bone mosola wa gore batho bangwe ba kgale mogopolo wa go katolola letamo le.

O akgoletse bana ba motse wa Kalakamati go bo ba kgobokantse madi ao, a ba kgothatsa go tswelela ba emela ditlhabololo ka dinao.

 

Rre Mbalambi o buile fa letamo le le beilwe fa go leng gontle thata ka le dikaganyeditswe ke dithaba a tlatsa ka gore se ke yone nako ya go le tlhabolola go nna lefelo la bojanala. Bokhutlo