10 Sep 2020

Mapodisi a tshegeditse monna mongwe wa dingwaga tse di lesome le bofera bongwe mabapi le polao ya rre yo o dingwaga tse di masome a mabedi le bobedi.

Mo potsolotsong, Superintendent Michael Maphephu o boletse fa bobedi joo bo tlholega mo kgotleng ya Letsibogo kwa Letlhakane. O tlhalositse fa ba ne ba tlhoka kutlwisisano mme mmelaelwa a tlhaba yo mongwe ka sengwe se se bogale.

Supt Maphephu a re rre yo o tlhabilweng o ne a ragosediwa kwa kokelong ya Letlhakane mme ba bongaka ba bolela fa a tlhokafetse.

Mo pegong e nngwe, Supt Maphephu a re ba tshegeditse rre wa dingwaga tse di masome a mabedi le borataro mabapi le matshosetsi a polao ya mokapelo wa gagwe yo o dingwaga tse di masome a mabedi le bosupa.

O tlhalositse fa bobedi joo le jone bo ne jwa tlhoka kutlwisisano fa wa mme a ne a ngongoregela gore monna ga a tlamele ngwana wa bone, ka jalo wa rre a tswela  kwa ntle mme a tla a tshwere sekupu sa leokwane ka maikaelelo a go tshubela mokapelo wa gagwe mo ntlong.

Supt Maphephu a re gape ba tlhotlhomisa kotsi ya koloi e e bolaileng rre wa dingwaga tse di masome a marataro mo tseleng ya Serowe/Orapa ka Tshipi.

O tlhalositse fa tiragalo eo e diragetse fa gare ga kgoro ya matlhoko a leruo ya Makoba le Letlhakane morago ga gore mokgweetsi a latlhegelwe ke taolo ya koloi. BOKHUTLO