06 Aug 2020

Kgosi ya motse wa Gulubane kwa kgaolong ya Bokone Botlhaba, Rre Ezekiel Gulubane o tlhokafetse.

Kgosi Gulubane yo o dingwaga di le masome matlhano le boferabobedi, o tlhokafetse morago ga go lwala ka bokhutshwane.

Mo potsolotsong le BOPA ka Laboraro, kgaitsadie moswi Mme Edith Masunga a re Kgosi Gulubane o tlhokafaletse kwa sepateleng se se ikemetseng sa Riverside kwa Francistown kgwedi eno e le malatsi  a le mararo.

Mme Masunga o boletse fa Kgosi Gulubane a ne a tlhongwa Kgosi ya Gulubane ka ngwaga wa 2006 morago ga go tlhokafala ga ga rraagwe, Kgosi Morris Gulubane.

A re pele moswi a tsaya setilo sa bogosi o ne berekela mo dikomponeng tse di farologaneng.

O tlhalositse fa Kgosi Gulubane e ne e le motho yo o lorato e bile a kgathala ka matshelo a batho ba bangwe, a supa fa e le ba lelwapa loora Gulubane le morafe wa motse oo ka kakaretso ba latlhegetswe ke mogaka.

Moswi Kgosi Gulubane o tlogela bana ba le babedi, mosimane le mosetsana, mmaagwe ga mmogo le bokgaitsadie ba le bane.

Kgosi Gulubane o tla bolokwa gone kwa Gulubane kgwedi eno e tlhola boferabobedi. Bokhutlo