12 Jul 2020

Mothusa Tautona, Rre Slumber Tsogwane, a re puso e eme ka dinao go dira mananeo a go tsosolosa itsholelo.

Rre Tsogwane o ne a bua jalo kwa Mahalapye ka Labotlhano kwa a neng a kopane le komiti ya kgaolo potlana ya Mahalapye ya COVID-19.

Rre Tsogwane a re puso e tlaa dira ka bojotlhe gore dikgwebo, bogolo jang tse dipotlana, di ikemele ka dinao ebile go nne le mananeo a masha a a ka thusang.

A re fa e sale segajaja sa COVID-19 se simologa, puso e dirisitse madi a mantsi go itebaganya le seemo.

A re kgaoganyo madi a setshaba e e neng ya fetisiwa ke Palamente ngwaga o simologa e amegile thata ka jaana madi a dirisitswe mo go lwantsheng segajaja sa COVID- 19.

A re Palamente e tlaa sekaseka gore go ka batlwa madi ka ditsela dife le gore go ka tsamaisiwa itsholelo jang go ya kwa pele.

O ne a ikuela mo Batswaneng go tswelela ka go sala morago melawana ya go thibela COVID-19.

A re le ntswa ditsamaiso dingwe jaaka go tlhapa matsogo kgapetsakgapetsa le go sa itshwareng mo sefatlhegong di le thata, Batswana ka bontsi ba di sala morago ba sa fele pelo.

A re puso e dirisitse madi a mantsi fa go neng go sa solofelwa  teng, ka jalo ga go na go nna le thulaganyo ya bobedi ya go phakisa dijo. Ka jalo, Rre Tsogwane a re fa go na le mongwe yo mo nakong eno a welang mo isong, o tlaa sekwasekwa ka lenaneo la botlhoki jwa nakwana mme a thusiwe.

A re ka nako e go neng ga thusiwa Batswana ka dijo, go ne ga supega fa bangwe ba ne ba di phakisiwa mme go ne go sa tshwanela gore go nne jalo.

A re badiri ba ipelegeng ba thusitse fela thata ka ba phatlaladitswe mo dikoleng go phepafatsa ebile ba thusa mo go apeeleng baithuti.

A re baithuti ba mo pabalesegong e e kwa godimo ntateng ya bophepa jo bo kwa godimo.

Mo go tse dingwe, mothusa tautona a re go na le kgwetlho ya leokwane mme seemo seo se bakilwe ke manokonoko a COVID-19 le tse dingwe tse di diragalang. A re seemo se se tlaa feta ka puso e itebagantse le sone.

A re seemo se, se tlhoka gore Batswana ba ithulaganye ka go itekanyetsa leokwane ka le tla a nna le tla mme botlhe ba bone nako ya go tshela dikoloi tsa bone.

Rre Tsogwane a re COVID-19 e rutile lefatshe leno gore le itirele  dilo dingwe segolo jang dijo.

A re fa bolwetse jo bo ka tswelela, mafatshe a go tsewang dijo kwa go one a tla a nna le dijo tse di ba lekaneng ba le nosi fela mme Batswana ga ba a tshwanela go bolawa ke tlala ba na le lefatshe le ba ka itemelang mo go lone.

A re COVID -19 e rutile lefatshe leno gore fa batho ba tshwaragane ba ka dira go le gontsi.

Rre Tsogwane o ne a supa fa popagano eo e supilwe ke dikomiti tsa COVID-19 tsa dikgaolo tse di neng di dira e le seopo sengwe.

O ne a leboga ba ba thusitseng mo letloleng la COVID-19 le botlhe ba ba tsereng karolo mo seemong se se thata.

O ne gape a lebogela badirelapuso ba ba neng ba amogwa tshwanelo ya bone ya kokeletso dituelo a bolela fa ba kolotwa mme ba tla a duelwa. BOKHUTLO