25 Jun 2020

Kgosi Charles Koitsiwe wa Broadhurst mo Gaborone a re ga  a itumedisiwe ke go bona  batsadi bangwe, bogolo jang banana ba atisa mokgwa wa go akaretsa bana mo dikgotlhannyeng tsa bone. 

Kgosi Koitsiwe o buile jalo mo potsolotsong le BOPA  ka Labobedi  mo Gaborone,  a re mokgwa o o felela o gotlhagotlhana le kgodiso ya ngwana.

O tlhalositse gore  bangwe batsadi ba felela ba retelelwa ke go tla ka tsela e e maleba e e ka ba thusang mo kgodisang ya ngwana ntswa ba sa nne mmogo.

Kgosi  Koitsiwe o supile fa gangwe le gape go na le go gogagoganela ngwana, kgotsa mongwe wa batsadi a seke a dire matsapa ape go ka thuso ka ditlamelo tse di ka godisang ngwana, a ipata ka go re fa a kgaogane le mokapelo ga go botlhokwa gore o ka ntsha sepe se se ka thusang.

Bangwe batsadi fa ba fiwa boikarabelo jwa go nna le  ngwana ba nna le mokgwa wa go ka mo ikgagapelela, ba itsa motsadi yo mongwe sebaka sa go ka amana le ngwana.

Kgosi  Koitsiwe a re le fa batsadi ba kgaogane, seo ga se reye gore kgodiso ya ngwana e tshwanetse go sekamela golo go le gongwe kgotsa ya imela motsadi a le mongwe.

A re ngwana o tshwanetse go fiwa sebaka sa go  itse batsadi botlhe go tswa kwa letlhakoreng la kwa ga mmaagwe le la  ga rraagwe.

Go sale foo, Kgosi Koitsiwe o ne gape a kgala mokgwa wa gore bangwe batsadi  ba bo ba amogela madi a kgodiso ya ngwana mme ba retelelwe ke go dirisa madi ao mo go maleba.  

A re mokgwa o ke go gweba ka ngwana.

Kgosi Koitsiwe o gakolotse  batsadi botlhokwa jwa go batla ditsela tse di maleba tebang le kgodiso ya ngwana fa ba kgaogana.

Kgosi o supile fa bomme bangwe ba atisa mogopolo wa go tlogela borre ka morwalo wa bana mme fela ba e ba dira ape maiteko a go thuso borre ka ditlamelo tsa kgodiso ya bana.

O gakolotse borre ba ba iphitlhelang ba le mo seemong se go ikuela le go kopa thuso kwa diofising tse di maleba.

 

A re borre ba seka ba nna ba-tswa setlhabelo sa kgokgontsho ba beile fela mo go reng ngwao e rotloetsa fa rre e le ene a tshwanetseng go fepa bana ba gagwe e seng go tlhokomelwa ke mme. BOPA