16 May 2020

Mokwaledi mo lephateng la tokafatso bodiredi le tlhabololo dikitso, Rre Kabelo Ebineng a re le fa bolwetse jwa COVID-19 bo le bosha bo sa akarediwa mo melawaneng ya phiro, badiri ba seka ba nna le pelaelo epe ka gore ba sireletsegile.

“Re a itse gore bolwetse jwa COVID -19 bo bosha, le fa bo seyo mo molaong go na le fa molao o buang ka malwetse a a tshelanwang teng, ka jalo itseng gore COVID-19 le yone e wela ka fa tlase ga tsetlana e,” ga tlhalosa Rre Ebineng. O ne a tlhalosa gore lekgotla la mafatshefatshe la botsogo la WHO, le supile gore bolwetse jwa COVID-19 bo wela ka fa tlase ga malwetse a tshelanwang.

O buile jalo mo puisanyong le babega dikgang ka Matlhatso a supa gore fa o ka nna le bothata mo tirong, ka mabaka a go tlhagoga ya bolwetse jwa COVID-19, Tautona o ka dirisa dithata tse a di filweng ka nakwana go baakanya seemo.

Rre Ebineng a re le fa go le botlhokwa go oketsa bodiredi mo legatong la boraro la go bulela ditirelo, selo sa botlhokwa go dirwa ke go sireletsa matshelo ka go obamela melawana ya botsogo, ka jalo a re madirelo a tshwanetse a nna mo seemong se se siametseng botsogo jwa babereki. A re le fa go ka tswa go na le dingwe tse di sa welang sentle mo madirelong, go tlhoka mowa wa neelano gore botshelo bo tswelele.

E rile a itebaganya le dikgang tsa mhiri le mmereki, Rre Ebineng a re go botlhokwa gore ba ikuele. “Leletsang mogala wa 16650 wa mahala, go bega dikgang tsa lona, diofisi tsa rona le tsone di butswe” ga tlhalosa Rre Ebineng. 

Rre Ebineng a re le fa molao o let a gore ngongorego e begwe pele ga malatsi a le masome mararo a wela, ka mabaka a gore bolwetse jwa COVID-19 bo kgopakgopetsana le tsamaiso ya tlwaelo, ba ba tlang morago ga lebaka le le beilweng ba tlaa thusiwa.

Rre Ebineng o ne a leboga bahiri ba ba ntseng ba dira sentle, ba tshegeditse ditumalano tsa phiro. “Ke leboga le bahiri ba ba baakantseng diphoso tse ba neng ba di dirile mabapi le dituelo tsa babereki, le babereki ba ba neng ba seka ba ipona tsapa go tsibogela dikgang tse di  ba amang tsa pereko. Babereki Itseng gore re le goromente, go na le ka fa re ka le sireletsang ka teng fa go sa tsamaisiwe sentle,” ga tlhalosa Rre Ebineng. BOKHUTLO