14 Apr 2020

Mapodise a Kang a tlhotlhomisa tiragalo e mo go yone mme wa dingwaga tse di masome mararo le bongwe wa kgotla ya Ga-Sekgalo kwa Kang a belaelwang gore o sentse mpa.

Mo potsolotsong le BOPA bosheng, mookamela mapodisi a Kang, Superintendent Olebeng Chingabe, a re ka Labotlhano ba kokelwana ya Kang ba ne ba ba begela fa ba na le mme mongwe yo ba belaelang a lekile go ipelegisa mme maiteko ao a folotsa.

A re go ya ka ba bongaka e ne ya re fa mmelaelwa a tlhatlhojwa a belaelwa mme a robadiwa gore a bewe leitlho mme ya re mo nakong e e sa fediseng pelo, mme yoo a tsogelwa ke ditlhabi a belega losea  lo lo tlhokafetseng, gape lo sena letsogo, ntswa a ne a latotse boimana.

A re ba bongaka ba tlhalosa fa go tlhoka letsogo ga ngwana go ne ga ba tlhobaetsa ka jaana bogole jwa teng bo ne bo sa sa supe e le jwa tlholego.

Supt Chingabe a re morago mapodisi ba ne ba ya go phuruphutsha kwa ntlong ya mme yoo, kwa ba neng ba feta ba fitlhela lebogo la losea le phuthilwe ka pampitshana e e dirisiwang kwa ntlwaneng.

     Le fa go ntse jalo, a re serepa se santse se tshegeditswe mo setsidifatsing go tlhatlhojwa ke dingaka go tlhomamisa se se ka tswang se bakile loso lwa losea, fa mosadi yoo ene a le kwa lwapeng go fitlhelela ditlhotlhomiso di wela.

Supt Chingabe a re fa ditlhotlhomiso tsa sepodisi di ka supa fa mme yoo a ne a le mo maikaelelong a go senya boimana o tlaa lebisiwa molato wa go bolaya ngwana yo o iseng a tsholwe mme a lebanwe ke kotlhao ya botshelo jotlhe mo kgolegelong. BOKHUTLO