01 Apr 2020

Mothusa Tona wa Dikgaolo le Tlhabololo Magae, Rre Sethabelo Modukanele, o kopile dikgosi tsa metse ya Khekhenye le Tshwaane kwa kgaolong ya Kweneng go kopa banni go itepatepanya le mogare wa corona. 

O buile se kwa bokopanong jwa dikgosi tsa metse e e mo kgaolwaneng ya Takatokwane ka Labobedi. 

A re mongwe le mongwe o tshwanetse go bona gore go ipabalelwa jang gore mogare o seka wa anama. 

Rre Modukanele o kopile dikgosi go bua le merafe ya bone go itlhokomela mo COVID-19 le go sala melaetsa morago jaaka go tlhapa diatla ka molora le metsi a a phepa. 

Mothusa tona o tlhalositse fa puso e tlaa tlamega go gagamatsa melao gore ba kganele mogare fa o setseng o le teng.

O kopile Batswana go se tsenwe ke tsebetsebe mme ba obamele ditaolo tsa ba bongaka, a supa fa ba solofela fa seemo se se tlaa feta.

O tlhalositse fa ba dira ka gotlhe gore fa seemo se se feta se bo se sa feta ka matshelo a batho ba le bantsi jaaka se dira kwa mafatsheng a mangwe.

Rre Modukanele o ne a kopa baeteledipele ba metse gore ba kopane go bona gore ba ka dira eng gore batho ba babalesege.

O kopile Batswana botlhe gore ba tseye molaetsa o o gorogang tsia, a bo a ba rurifaletsa fa ba ya go kopana gore ba ka tsaya dikgato dife tse disha. 

Rre Modukanele o tlhalositse fa Batswana ba tshwanetse go itse fa Modimo a le teng mme a tlaa ba sireletsa mo go tsotlhe.

Mopalamente wa kgaolo ya Takatokwane, Rre Friction Leuwe, o ne a kopa dikgosi go tswelela ka go gakolola merafe ka segajaja se, a ba a ba rotloetsa go nna moko o thata mo go kgothatseng batho, a re ba se kgojwe marapo ke ba ba sa nkeng ba utlwa gangwefela. 

O ne a kopa baeteledipele go netetefatsa gore banni ba metse ya bone ga ba rekise bojalwa ka boferefere a bo a supa fa ba tlaa bo ba sa tsietse puso mme go ipolaya bone fa ba dira jalo.

Rre Leuwe a re seemo se se ka laolesega fela fa mongwe le mongwe  a ka dira seabe sa gagwe. 

O ne a lebogela mothusa tona go ba lekola, a bo a kopa banni go ipabalela le a baruti go tswelela ba rapela Modimo. Bokhutlo